Төрт сағатқа жуық тартыс: Шевченко US Open турнирінің алғашқы айналымынан ұшып кетті
Александр Шевченко US Open-2026 турнирінің алғашқы кезеңінен өте алмады. ATP рейтингінде 97-орында тұрған қазақстандық теннисші бес сетке созылған кездесуде әлемдік рейтингтің 101-сатысындағы хорват Дино Прижмичке есе жіберді, деп хабарлайды Sports24.kz.
Матч 3 сағат 55 минутқа созылды. Шевченко алғашқы сетті 6:2 есебімен сенімді аяқтағанымен, кейін қарсыласы ойын тізгінін өз қолына алып, келесі екі партияны 6:3, 6:3 есебімен жеңіп кетті.
Қазақстандық теннисші матчтың төрт сетте аяқталуына мүмкіндік бермеді. Александр төртінші партияда тай-брейкте 7:5 есебімен басым түсіп, кездесуді шешуші сетке жеткізді. Бесінші партияда да оның жеңіске жетуге мүмкіндігі болды: Шевченко екі матчболға дейін жетті, бірақ екеуін де пайдалана алмады.
Шешуші сәттерде Прижмич жинақы ойнап, соңғы сетті 7:5 есебімен өз пайдасына аяқтады. Осылайша хорватиялық теннисші екінші айналымға жолдама алды.
US Open-2026. Ерлер. Бірінші айналым
Александр Шевченко – Дино Прижмич – 6:2, 3:6, 3:6, 7:6 (7:5), 5:7
Осылайша, Шевченко АҚШ ашық чемпионатындағы өнерін алғашқы матчтан кейін аяқтады.
Енді қазақстандық жанкүйерлердің назары Александр Бубликке ауады. 31 тамыз күні таңертең Қазақстанның бірінші ракеткасы US Open-2026 турниріндегі алғашқы кездесуін өткізеді.
Бублик жарысты ATP рейтингінде 248-орында тұрған америкалық Джеффри Вулфқа қарсы матчпен бастайды. Кездесу Астана уақытымен 05:30-да басталады.
