Рыбакинаның қарсыласы US Open турнирін сенімді жеңіспен бастады: ол кім?
Америкалық теннисші Джессика Пегула US Open-2026 турниріндегі өнерін сенімді бастады. Әлемнің үшінші ракеткасы бірінші айналымда Румыния өкілі Елена-Габриэла Русемен кездесіп, қарсыласына матчта айтарлықтай қарсылық көрсетуге мүмкіндік бермеді, деп хабарлайды Sports24.kz.
Пегула кездесуді екі сетте – 6:3, 6:2 есебімен жеңді. Матч 1 сағат 23 минутқа созылды.
US Open-2026. Әйелдер. Бірінші айналым
Джессика Пегула – Елена-Габриэла Русе – 6:3, 6:2
Америкалық теннисші алғашқы геймдерден-ақ ойын тізгінін өз қолына алып, біртіндеп қысымды күшейте түсті. Русе кей сәттерде қарсыласының қарқынына ілесе алғанымен, шешуші ұпайлар кезінде Пегула тұрақтырақ ойнап, кездесудің ұзаққа созылуына жол бермеді.
Бұл жеңіс Пегуланың өзі үшін ғана емес, әлемдік рейтингтің бірінші орны үшін жүріп жатқан тартыс тұрғысынан да маңызды. WTA-ның live-рейтингіндегі соңғы өзгерістерден кейін Елена Рыбакина 7911 ұпаймен бірінші орында, Арина Соболенко 6585 ұпаймен екінші, ал Пегула 6555 ұпаймен үшінші сатыда тұр.
Сонымен қатар америкалық теннисшінің жоғары көтерілу мүмкіндігі әлі де бар. US Open барысында оның жинай алатын ең жоғары көрсеткіші 8485 ұпайды құрайды. Сондықтан Пегула турнирде алысқа барса, бірінші орын үшін таласқа тікелей араласа алады.
Сол себепті америкалық теннисшінің әрбір келесі матчы Рыбакинаның жағдайына тікелей әсер етуі мүмкін. Қазақстандық теннисші қазір live-рейтингте көш бастап тұр, алайда оның бірінші орындағы басымдығын әзірге түпкілікті деп санауға болмайды.
Екінші айналымда Пегула америкалықтар Винус Уильямс пен София Кенин арасындағы кездесудің жеңімпазымен ойнайды.
Ал Елена Рыбакина US Open-2026 турниріндегі жолын WTA рейтингінде 580-орында тұрған 17 жастағы америкалық Теа Фродинге қарсы матчпен бастайды. Қазақстандық теннисшінің кездесуі 1 қыркүйек күні Астана уақытымен сағат 20:00-ге жоспарланған.
