Ясмина Токсанбаева Азия ойындарындағы даудан кейінгі қиын кезең туралы айтты
Қазақстандық жеңіл атлет Ясмина Токсанбаева 2026 жылғы Азия ойындарындағы оқиғалардан кейінгі психологиялық жағдайы туралы айтып, алдағы спорттық мақсатын атады, деп хабарлайды Sports24.kz.
Бұл туралы ол журналист Рауль Габитовке берген сұхбатында мәлімдеді.
Басынан өткен оқиғалардан кейінгі бүгінгі марапаттың өзі үшін қаншалықты маңызды екені туралы сұраққа жауап берген спортшы соңғы айдың психологиялық тұрғыдан өте ауыр болғанын мойындады.
«Бұл ай мен үшін өте ауыр болды, психологиялық тұрғыдан да оңайға соққан жоқ. Қазір осы жағдайды еңсеруге тырысып жүрмін. Бүгінгі кездесу менің құлдырап, қиын жағдайға тап болмауыма көмектесті. Мен бұған өте ризамын. Бұл кездесу маған күш-қуат беріп, алдағы уақытта да жұмыс істеуге жігерлендірді», – деді Токсанбаева.
Токсанбаева алдағы жоспарлары туралы да айтты. Оның сөзінше, ең жақын мақсаты – келесі жылы өтетін әлем чемпионатына қатысу үшін қажетті нормативті орындау.
«Келесі мақсатым – әлем чемпионатының нормативін орындау. Әрине, келесі жылғы әлем чемпионатына қатысып, бұл жетістіктің кездейсоқ болмағанын бүкіл әлемге дәлелдегім келеді», – деп атап өтті жеңіл атлет.
Еске салайық, 27 қыркүйекте Жапонияда өткен Азия ойындарында Ясмина Токсанбаева 42,195 шақырымдық марафондық спорттық жүрісте 3 сағат 22 минут 20 секунд нәтижесімен мәреге бірінші болып жетті. Алайда World Athletics ұйымы спортшының аяқкиімін тексергеннен кейін оның нәтижесін жойды. Себебі Токсанбаева пайдаланған аяқкиім үлгісі жарыстарда қолдануға рұқсат етілген тізімге енбеген. Нәтижесінде қазақстандық спортшы алтын медальдан айырылып, чемпион атанған Қытай өкілі болды.
Сонымен қатар Қазақстан жеңіл атлетика федерациясы бұл шешімге шағым түсіруге ниетті екенін мәлімдеп, Токсанбаеваға чемпионға тиесілі ақшалай сыйақыны төлеуге уәде берді.
9 қарашада Қазақстан Президенті Қасым-Жомарт Тоқаев Азия ойындары мен Азия пара ойындарының қорытындысы бойынша спортшыларды мемлекеттік наградалармен марапаттау туралы Жарлыққа қол қойды. Ясмина Токсанбаева «Ерен еңбегі үшін» медалімен марапатталғандар тізіміне енді. Жарлықта ол жеңіл атлетикадан марафондық жарысқа қатысушы ретінде көрсетілген.
