Ресми: Қазақстан Еуропа чемпионатын өткізуге өтінім берді
Қазақстан 2030 жылғы футзалдан Еуропа чемпионатын өткізуге өтінім берді, деп хабарлайды Sports24.kz.
УЕФА-ның ресми сайтының хабарлауынша, жеті ұлттық қауымдастық турнирді өткізуге қызығушылық білдірді.
Қазақстан, Хорватия, Финляндия, Франция, Грузия, Польша және Испания финалдық турнирді өткізуге қызығушылық танытқаны туралы өтінім берді. Хорватия мен Испания бұған дейін футзалдан Еуропа чемпионатын қабылдаған болса, қалған бес қауымдастық бұл турнирді алғаш рет өткізуі мүмкін.
Өтінім берудің соңғы құжаттары 2027 жылғы 8 маусымға дейін тапсырылуы тиіс, ал УЕФА Атқарушы комитеті қабылдаушы қауымдастықты 2027 жылғы қыркүйекте анықтауы керек.
Айта кетейік, өтінім беру процесі Латвия, Литва және Словенияда өткен футзалдан 2026 жылғы Еуропа чемпионатынан кейін басталды. Көрермендердің жоғары белсенділігі, сондай-ақ цифрлық және әлеуметтік платформалардағы рекордтық көрсеткіштер жарыстың ауқымы артып, Еуропадағы футзалдың одан әрі дамып келе жатқанын көрсетеді.
Айтпақшы, бұған дейін УЕФА Астанада футзалдан 2027 жылғы жасөспірімдер арасындағы Еуропа чемпионатының финалдық кезеңі өтетінін ресми түрде бекіткен болатын.
