Париж мэрі GTA 6-ға бола жұмысқа кешікті деген қауесетке жауап берді
Париж мэрі Эммануэль Грегуар GTA 6 шыққандықтан жұмысқа үш сағатқа кешікті деген қауесетке жауап берді, деп хабарлайды Sports24.kz.
Әлеуметтік желідегі талқылауға блогер Энзо Морельдің X желісіндегі жазбасы себеп болды. Оның болжамынша, 19 қарашада қала басшысы жаңа Rockstar Games ойынын түні бойы ойнап, Париж қалалық кеңесі отырысының басына қатыспаған.
Блогер бұл жорамалды Грегуардың Instagram-дағы жазбасымен байланыстырды. Ойын жарыққа шығар алдында мэр GTA 6-ның шығуына дейінгі кері санақты жариялап, оған «Let’s go!» деген жазу қалдырған.
Морельдің айтуынша, қалалық кеңестің отырысы сағат 9:00-де басталғанымен, Грегуар тек түске таман келген. Бұл ақпарат әлеуметтік желілерде тез тарады.
Париж мэрі тағылған айыпқа үнсіз қалмай, жұмысқа кешікті деген хабарды жоққа шығарды.
«Кестеме алаңдағандарыңызға рақмет, бірақ мен таңғы 9-ға белгіленген кездесуге уақтылы келдім. Париж мэриясының этика жөніндегі уәкілімен өз кабинетімде кездестім, онымен үнемі кездесіп тұрамын. Одан кейін Париж қалалық кеңесінің отырысына төрағалық еттім», - деп жазды Грегуар X желісінде.