Елдос Сметов 2026 жылғы Азия ойындарының жартылай финалына шықты
Париж Олимпиадасының чемпионы Елдос Сметов Азия ойындарының жартылай финалына шықты, деп хабарлайды Sports24.kz.
ҚР Туризм және спорт министрлігінің Спортты дамыту дирекциясының баспасөз қызметі хабарлағандай, Жапонияда өтіп жатқан ХХ жазғы Азия ойындарында дзюдодан жарыстар жалғасуда.
60 келіге дейінгі салмақ дәрежесінде Елдос Сметов ширек финалда моңғолиялық Аринболд Енхтейвенді иппонмен жеңді.
Жартылай финалда ол Қытайлық Тайбэй өкілі Юнг-Вей Янгпен кездеседі.
Бұған дейін Сметов Азия ойындарындағы алғашқы қарсыласын мерзімінен бұрын жеңген еді – бірінші айналымда Оңтүстік Корея өкілі Ли Харимді иппонмен ұтты.
Айта кетейік, бүгін әйелдер арасындағы 48 және 52 келіге дейінгі, сондай-ақ ерлер арасындағы 60 және 66 келіге дейінгі салмақ дәрежелерінде жүлдегерлер анықталады.
Елдос Сметов – қазақстандық дзюдошы, 2024 жылғы Париж Олимпиадасының чемпионы, 2016 жылғы Рио-де-Жанейро Олимпиадасының күміс жүлдегері, 2020 жылғы Токио Олимпиадасының қола жүлдегері, 2015 жылғы әлем чемпионы, 2022 жылғы әлем чемпионатының қола жүлдегері, 2010 жылғы жастар арасындағы әлем чемпионы, 2016 жылғы Азия чемпионы, 2014 жылғы Азия ойындарының жеңімпазы.
