Чимаев RAF лигасында жеңіске жетіп, мәлімдеме жасады
БАӘ атынан өнер көрсететін UFC файтері Хамзат Чимаев Real American Freestyle лигасында кезекті жеңісіне қол жеткізді. АҚШ-тың Майами қаласында өткен RAF 13 турнирінде ол бразилиялық Гилберт Бёрнспен кездесті, деп хабарлайды Sports24.kz.
Орта салмақтағы жекпе-жек екінші раундта мерзімінен бұрын аяқталды. Чимаев 15:4 есебімен жеңіске жетті.
Жекпе-жектен кейін Хамзат UFC-дің бұрынғы файтері Колби Ковингтонға үн қатып, оны жекпе-жекке шақырды.
Чимаев үшін бұл жеңіс RAF промоушеніндегі үшінші жетістігі болды. Бұған дейін ол лигадағы дебютінде Диллон Дэниспен жекпе-жекте жеңіске жетіп, кейін Тайрон Вудлиден басым түскен. Ал Бёрнс Real American Freestyle лигасында алғаш рет өнер көрсетті.
Чимаев пен Бёрнс кәсіби ММА аясында бұған дейін де кездескен. Олардың жекпе-жегі 2022 жылғы сәуірде UFC 273 турнирінде өтіп, Хамзаттың төрешілердің бірауызды шешімімен жеңуімен аяқталған.
Еске сала кетейік, RAF лигасында Қазақстан атынан еркін күрестен әлем чемпионы Ризабек Айтмұхан, сондай-ақ танымал қазақстандық ММА файтерлері Асу Алмабаев пен Қуат Хамитов өнер көрсетіп жүр.
