Жалолов келесі жекпе-жегін Лондонда өткізеді: қарсыласы кім?
Екі дүркін Олимпиада чемпионы Баходир Жалолов келесі кәсіпқой жекпе-жегін Лондонда өткізеді. Өзбекстандық жеңілмеген аса ауыр салмақ өкілі 17 қазанда The O2 аренасында рингке шығады, деп хабарлайды Sports24.kz.
Жалоловтың қарсыласы британиялық Соломон Дакрес болады. Queensberry Promotions ұйымдастыратын бокс кешінің басты жекпе-жегінде Даниэль Дюбуа мен Фабио Уордли қарымта кездесуде жұдырықтасады.
Жалолов кәсіпқой бокста әлі жеңілген жоқ. Оның еншісінде 17 жеңіс бар, соның 15-ін нокаутпен аяқтаған. Өзбекстандық боксшы соңғы рет 9 мамырда Манчестерде хорватиялық Агрон Смакичимен кездескен. Жетінші раундтан кейін қарсыласының бұрышы жекпе-жекті жалғастырудан бас тартып, Жалолов техникалық нокаутпен жеңіске жетті.
Дакрес кәсіпқой рингте 10 рет жеңіске жетіп, бір мәрте жеңілген. Үш кездесуін нокаутпен аяқтаған. Британиялық боксшы соңғы жекпе-жегін 2025 жылдың 19 шілдесінде Лондондағы «Уэмбли» стадионында өткізді. Ол сол кезде украиналық Владислав Сиренкомен он раунд толық жұдырықтасып, төрешілердің бірауыздан шығарған шешімімен жеңіске жетті.
Осылайша, Жалолов Ұлыбританияда тағы бір жекпе-жек өткізгелі отыр. Бұл жолы екі дүркін Олимпиада чемпионы өзінің жеңіліссіз сериясын жергілікті аса ауыр салмақ өкіліне қарсы кездесуде жалғастыруға тырысады.
