Шил кеткеннен кейін «Барыстың» кімге қызығушылық танытып отырғаны белгілі болды
Астаналық «Барыс» жаңа маусым қарсаңында құрамды күшейту жұмыстарын жалғастырып жатыр, деп хабарлайды Sports24.kz.
Хоккей шолушысы Алексей Шевченконың мәліметінше, қазақстандық клуб америкалық қақпашы Кейден Примоға қызығушылық танытуда.
«Барыс» ҰХЛ тәжірибесі бар қақпашыны бақылап отыр
26 жастағы голкипер - Солтүстік Америка хоккей мектебінің түлегі және Ұлттық хоккей лигасында ойнаған тәжірибесі бар ойыншы.
Примо 2017 жылғы ҰХЛ драфтында «Монреаль Канадиенс» клубы тарапынан 199-нөмірмен таңдалды.
Мансабында ол ҰХЛ-де 58 матч өткізіп, 15 жеңіске қол жеткізді. Орта есеппен бір ойында 3,73 шайба жіберіп, соққылардың 88,2 пайызын қайтарған.
Кейден Примо қай клубтарда ойнады?
Өткен маусымды америкалық қақпашы «Каролина Харрикейнз» жүйесінде бастады.
Кейін ол «Торонто Мэйпл Лифс» клубына ауысып, артынша драфт арқылы қайтадан «Каролинаға» оралды.
2025/26 жылғы маусымда Примо ҰХЛ-де үш матч өткізіп, екі жеңіске жетті.
«Барыс» бір қақпашысымен қоштасты
Примоға деген қызығушылық клубтан америкалық қақпашы Адам Шил кеткеннен кейін пайда болды.
Бұған дейін Шилдің «Барыс» сапынан ресми түрде кетіп, мансабын Германияда жалғастыратыны белгілі болған еді. Оның жаңа клубы - «Левен Франкфурт».
Өткен маусымда Шил астаналық клуб сапында ҚХЛ-де 32 матч өткізіп, соққылардың 90,8 пайызын қайтарды. Ал сенімділік коэффициенті 2,81 болды.
«Барыс» өткен маусымды қалай аяқтады?
Еске салсақ, Михаил Кравец жаттықтыратын команда өткен маусымда тағы да плей-офф кезеңіне шыға алмады.
«Барыс» Шығыс конференциясында 68 матчтан кейін 54 ұпай жинап, оныншы орынмен аяқтады.
Маусым бойы астаналық клуб 154 шайба соғып, өз қақпасына 208 шайба жіберіп алды.