«Металлургты» жеңгеннен кейін «Барыс» ҚХЛ-да нешінші орынға жайғасты
Астаналық «Барыс» Құрлықтық хоккей лигасының (ҚХЛ) тұрақты чемпионатында турнирлік жағдайын жақсартуды жалғастыруда. Магнитогорскінің «Металлург» командасын 5:4 есебімен жеңген Михаил Кравец шәкірттері ұпай қорын 29-ға жеткізіп, Шығыс конференциясындағы бесінші орнын сақтап қалды, деп хабарлайды Sports24.kz.
15 қарашада «Барыс Аренада» өткен кездесуде елордалық клуб алғашқы болып шайба жіберіп алды. Дегенмен бірінші кезең аяқталғанша Джастин Бэйли мен Чейз Приски мергендік танытып, алаң иелерін алға шығарды.
Екінші жиырма минуттықта Бэйли тағы екі мәрте көзге түсіп, хет-трик жасады. Шешуші кезеңде қонақтар есеп айырмасын қысқартуға тырысқанымен, Кирилл Савицкийдің бос қақпаға соққан шайбасы астаналықтарға жеңісті сақтап қалуға көмектесті.
Бұл «Барыстың» өз айдынындағы қатарынан екінші жеңісі болды. Бұған дейін Михаил Кравец баптайтын ұжым Владивостоктың «Адмирал» командасынан 4:2 есебімен басым түскен еді.
«Барыс» ҚХЛ турнирлік кестесінде нешінші орында тұр?
Тұрақты чемпионатта 26 кездесу өткізген қазақстандық клуб 29 ұпай жинап, Шығыс конференциясының бесінші сатысына жайғасты.
Көшбасшыны жеңгеніне қарамастан, «Барыс» турнирлік кестеде жоғары көтерілген жоқ. Алайда алғашқы үштікке дейінгі айырмашылық бар болғаны бір ұпайды құрайды.
Үшінші орында 25 матчтан кейін 30 ұпай жинаған Омбының «Авангард» командасы тұр. Демек, астаналықтар бұл қарсыласынан небәрі бір ұпайға қалып келеді. Оның үстіне, омбылықтар бір ойын кем өткізген.
Төртінші сатыға Хабаровскінің «Амуры» орналасқан. Команда 25 кездесуде 29 ұпай еншіледі. Дәл осындай көрсеткіш Екатеринбургтің «Автомобилист» клубында да бар. Алайда бір ойыны кем бұл ұжым «Барыстан» кейінгі алтыншы орында тұр.
Шығыс конференциясының көшін әлі де магнитогорскілік «Металлург» бастап келеді. Астанада жеңіліс тапқанына қарамастан, ресейлік клуб 27 матчта жинаған 39 ұпайымен бірінші орнын сақтап қалды. «Барыстың» көшбасшыдан айырмашылығы енді он ұпайға тең.
Екінші орында Нижнекамскінің «Нефтехимик» командасы орналасқан. Оның еншісінде 27 ойыннан кейін 31 ұпай бар.
Қазақстандық клубтан кейінгі жетінші сатыны Қазанның «Ак Барсы» иеленіп отыр. Команда 28 кездесуде 28 ұпай жинаған. Сегізінші орында 26 матчтан кейін 27 ұпай еншілеген Челябінің «Тракторы» тұр.
Тоғызыншы орынға Уфаның «Салават Юлаев» клубы жайғасқан. Оның қоржынында 26 кездесуден кейін 26 ұпай бар. Оныншы сатыдағы «Адмирал» 25 ойында 25 ұпай жинаса, Шығыс конференциясының турнирлік кестесін 27 матчтан кейін 22 ұпай еншілеген Новосібірдің «Сибірі» түйіндеп тұр.
Қатарынан екі үй кездесуінде жеңіске жеткен «Барыс» плей-офф аймағындағы орнын сақтап қана қоймай, үздік үштікке де жақындай түсті. Дегенмен конференцияның орта бөлігіндегі бәсеке әлі де жоғары. Қазір үш команданың қоржынында 29 ұпайдан бар, сондықтан әрбір келесі ойынның маңызы арта түседі.
Михаил Кравец шәкірттері келесі кездесуін 18 қарашада сырт айдында «Салават Юлаевқа» қарсы өткізеді. Уфадағы ойын елордалық клуб үшін плей-офф жолдамасына таластағы орнын нығайтуға тағы бір мүмкіндік болмақ.
