«Барыс» басымдығын сақтай алмай, ҚХЛ-дағы жеңісті сериясын тоқтатты
Елордалық «Барыс» Құрлықтық хоккей лигасының (ҚХЛ) тұрақты чемпионатындағы жеңісті сериясын жалғастыра алмады. Қазақстандық клуб өз алаңында Новосібірдің «Сибирь» командасын қабылдап, 2:3 есебімен есе жіберді, деп хабарлайды Sports24.kz.
Кездесудің басында қонақтар белсенділік танытты. 12-минутта Никита Никулин сан басымдығын тиімді пайдаланып, «Сибирьді» алға шығарды. Алайда Михаил Кравец шәкірттері көп ұзамай ойын тізгінін өз қолына алып, жағдайды өзгерте алды.
Алдымен Мэйсон Морелли есепті теңестірсе, бірінші кезеңнің аяқталуына аз уақыт қалғанда Кирилл Савицкий қарсылас қақпасына екінші шайбаны соқты. Осылайша, астаналықтар алғашқы үзіліске 2:1 есебімен басымдықпен шықты.
Екінші кезеңде қос команда да қарсылас қақпасынан саңылау таба алмады. «Барыс» бір шайбалық басымдығын сақтап қалғанымен, шешуші жиырма минуттықта ойын барысы түбегейлі өзгерді.
51-минутта Тэйлор Бек сан басымдығын пайдаланып, таразы басын теңестірді. Арада бес минутқа жетпейтін уақыт өткенде Владислав Тютнев «Сибирьдің» үшінші шайбасын соғып, командасына жеңіс сыйлады.
ҚХЛ. Тұрақты чемпионат. 2026/27 жылғы маусым
«Барыс» (Астана, Қазақстан) – «Сибирь» (Новосібір, Ресей) – 2:3 (2:1, 0:0, 0:2)
Шайбалар: 0:1 – Никулин (11:38, сан басымдығында); 1:1 – Морелли (13:24); 2:1 – Савицкий (18:09); 2:2 – Бек (50:58, сан басымдығында); 2:3 – Тютнев (55:36).
Осылайша, «Барыс» қолындағы басымдығын сақтай алмай, қатарынан үш жеңістен кейін жеңіліс тапты. Бұған дейін елордалық клуб «Нефтехимикті» (5:4, қосымша уақытта), мәскеулік «Спартакты» (4:3, буллиттер сериясында) және Омбының «Авангард» командасын (5:1) жеңген болатын.
«Барыс» келесі кездесуін 14 қазанда Екатеринбургтің «Автомобилист» командасына қарсы өткізеді. Матч елордалық клубтың өз алаңында Қазақстан уақытымен сағат 19:30-да басталады.
