«Барыс» ҚХЛ-дағы тартысты матчта «Сибирьден» жеңілді: кездесудің бейнешолуы
Қазақстандық «Барыс» Құрлықтық хоккей лигасының (ҚХЛ) тұрақты чемпионатында өкінішті жеңіліске ұшырады. Новосібірдің «Сибирь» командасына қарсы кездесу 2:3 есебімен аяқталды, деп хабарлайды Sports24.kz.
Қонақтар 12-минутта Никита Никулиннің шайбасының арқасында есеп ашты. Алайда астаналықтар көп күттірмей жауап қайтарды. Алдымен Мэйсон Морелли есепті теңестірсе, бірінші кезеңнің соңына қарай Кирилл Савицкий «Барысты» алға шығарды.
Екінші кезеңде қос команда да гол соға алмады. Осылайша, кездесудің тағдыры шешуші жиырма минуттықта анықталды.
51-минутта Тэйлор Бек сан басымдығын пайдаланып, есепті теңестірді. Арада бес минут өткенде Владислав Тютнев жеңіс шайбасын соғып, «Сибирьге» жеңіс сыйлады.
Осылайша, «Барыстың» қатарынан үш матчқа созылған жеңісті сериясы үзілді. Елордалық клуб 16 ұпаймен Шығыс конференциясының бесінші орнына түсті.
Назарларыңызға «Барыс» пен «Сибирь» арасындағы кездесудің барлық шайбалары мен маңызды сәттері қамтылған бейнешолуды ұсынамыз.
