Жылдың курьезі: доп беруші бала өз командасының гол соғуына кедергі келтірді. ВИДЕО
Чилидегі драмалық матчтың ең күтпеген кейіпкері доп беріп тұратын бала болды, деп хабарлайды Sports24.kz.
Чилидің Примера B лигасындағы «Унион Эспаньоланың» «Рейнджерс де Талькаға» қарсы өз алаңындағы матчында 88-минутта ерекше оқиға болды. «Санта-Лаура» стадионында алаң иелері 0:1 есебімен жеңіліп жатып, есепті теңестіруге бар күшін салып жатқан. Сол сәтте команданың доп беріп тұратын балаларының бірі күтпеген жерден алаңға жүгіріп шықты.
Бұдан қолайсыз уақытты елестету қиын еді. «Унион Эспаньола» қауіпті шабуыл ұйымдастырып, «Рейнджерстің» айып алаңына ұзын пас бағыттады. Сол жерде Андрес Вильчес бастаманы өз қолына алып, қауіпті позицияға шығуға дайын тұрған.
Алайда алаңда екінші доп жатты. Доп беруші бала оны алып тастау үшін алаңға жүгіріп шықты. Ол оқиғаның дәл ортасында қалып, «Рейнджерстің» қорғаушысына кедергі келтірді. Осыдан кейін төреші ойынды тоқтатуға мәжбүр болды. Нәтижесінде «Унион Эспаньоланың» перспективалы шабуылы жалғаспай, өте оғаш жағдайда үзіліп қалды.
Бұл эпизод алаң иелері үшін тіпті ауыр болды, өйткені «Рейнджерс» 72-минуттан бері Дамиан Гонсалестің қызыл қағаз алуына байланысты алаңда он адаммен ойнап жатқан еді. «Унион Эспаньола» есепті теңестіру үшін ойыншыларын алға жібергенімен, сандық басымдығын пайдалана алмады және ақырында 0:1 есебімен жеңілді.
Жалғыз голды 56-минутта Хуниор Ариас пенальтиден соқты. Бұл жеңіліс «Унион Эспаньоланың» Примера B-дегі қатарынан үш матчқа созылған жеңіс сериясын үзді. Ойыннан кейін команда 34 ұпаймен бесінші орында қалды. Ал турнир кестесінің соңында тұрған «Рейнджерс» лигадағы екінші жеңісіне қол жеткізіп, ұпай санын 12-ге жеткізді.
