Жаслан Жұмашев: Ең бастысы – Жақсыбаев тезірек сауығып кетсе екен
Костанайлық «Тобылдың» вингері Жаслан Жұмашев Қазақстан Премьер-лигасының тоғызыншы турынан кейінге қалған «Ордабасыға» қарсы ойынынан (1:0) кейін әсерімен бөлісті.
«Алаңға қайта шығып, командаға пайда тигізіп жатқаным қуантады. Командадағы жігіттердің қолдауының арқасында ойынға тез бейімделіп, сенімділік сезіндім», — деді футболшы.
Ұлар Жақсыбаевпен болған қатаң қақтығыс жайлы пікір білдірген Жұмашев бұл тек ойын сәті екенін атап өтті:
«Өте өкінішті жағдай. Ең алдымен Уларға тезірек сауығып кетуін тілеймін. Футболда мұндай қақтығыстар болмай тұрмайды, бірақ менің тарапымнан әдейі әрекет болған жоқ. Қазір ең маңыздысы – оның тезірек алаңға оралып, жанкүйерлерін қуанта беруі»
Еске сала кетейік, ойынның соңына қарай «Ордабасы» қорғаушысы жарақат алып, орнынан тұра алмай қалды. Дәрігерлер бірден көмек көрсетіп, оны зембілмен алаңнан алып кетті. Тікелей эфирде ойыншының қатты ауырсынғаны, көз жасын жасыра алмағаны байқалды. Алдын ала мәлімет бойынша, Жақсыбаевтың айқыш-байлам жарақаты болуы мүмкін.
30 жастағы қорғаушы «Ордабасы» сапында өнер көрсетіп жүр және Қазақстан құрамасы үшін үш ойынға қатысқан. Оның дебюті өткен жылдың қазан айында Австрияға қарсы сырттағы кездесуде өтті. Сондай-ақ ол Уэльс пен Бельгияға қарсы матчтарда алаңға шыққан.
Костанайдағы матч «Тобылдың» 1:0 есебіндегі жеңісімен аяқталды. Жеңіс голын пенальтиден Ислам Чесноков соқты.
