Уразбахтин «Қайраттың» Еуропа лигасынан шығып қалуына баға берді
Алматылық «Қайраттың» бас бапкері Рафаэль Уразбахтин Еуропа лигасының плей-офф кезеңінің жауапты матчында бельгиялық «Андерлехттен» жеңілгеннен кейін пікір білдірді, деп хабарлайды Sports24.kz.
Брюссельде өткен кездесу алаң иелерінің 3:0 есебімен жеңісімен аяқталды. Алматыдағы алғашқы матч та дәл осындай есеппен аяқталған болатын. Осылайша, екі ойынның қорытындысы бойынша «Андерлехт» 6:0 есебімен жеңіске жетті.
Уразбахтин бельгиялық команданың басымдығын мойындап, қазақстандық футболшылар үшін халықаралық тәжірибенің маңыздылығын атап өтті.
«Бұл жеңілісті қабылдауымыз керек. Сонымен қатар объективті түрде қарасақ, қарсылас бізден мықты. Қарсылас команданы жеңісімен құттықтаймын және алдағы ойындарына сәттілік тілеймін.
Біз үшін Конференция лигасы да жаман нұсқа емес деп ойлаймын. Өткен жылы да осы туралы айтқан едім. Маған былтыр «Чемпиондар лигасында ойнадыңыздар, енді жыл сайын Чемпиондар лигасында ойнайсыздар ма?» деген сұрақ қойылды. Мен сол кезде турнирдің қайсысы болғаны маңызды емес, ең бастысы — қазақстандық командалар тұрақты түрде халықаралық аренада өнер көрсетуі керек дедім. Мүмкіндік болса, Чемпиондар лигасы, Конференция лигасы немесе Еуропа лигасы болсын.
Сондықтан кез келген турнирде ойнап, халықаралық тәжірибе жинау өте маңызды. Бұл біздің командаға және еліміздегі футболдың дамуына қажет. Жалпы алғанда, бұл біздің жігіттер үшін жақсы мектеп болды.
Бүгін алаңда бір сәтте тоғыз қазақстандық футболшы болды. Сондықтан олар үшін бұл, әрине, баға жетпес тәжірибе. Осындай қарсыластармен өткізілген ойындардың арқасында ғана футболшылар мықты бола түседі. Бұл ұлттық құрамаларымыз үшін де үлкен плюс», — деді маман.
Еуропа лигасынан шығып қалған «Қайрат» еурокубоктағы жолын Конференция лигасының негізгі кезеңінде жалғастырады.
