«Қайраттың» «Андерлехтке» қарсы шешуші матчы: бельгиялық БАҚ не жазып жатыр?
27 тамызда алматылық «Қайрат» Брюссельде Еуропа лигасының плей-офф кезеңі аясындағы «Андерлехтке» қарсы қарымта матч өткізеді. Алматыда өткен алғашқы кездесуде бельгиялық клуб 3:0 есебімен жеңіске жетті, деп хабарлайды Sports24.kz.
Бельгиялық БАҚ өкілдері «Андерлехттің» турнирдің негізгі кезеңіне шығатынына іс жүзінде күмән келтірмейді. VoetbalPrimeur.be қарымта кездесуді «жай ғана формальдылық» деп атап, тек есептегі ірі басымдыққа ғана емес, командалар арасындағы деңгей айырмашылығына да назар аударды.
Voetbalkrant та «Қайрат» енді брюссельдік командаға айтарлықтай қауіп төндіре алмайды деп санайды. Сонымен қатар бельгиялықтардың назары қазірдің өзінде «Андерлехттің» келесі ойынына — «Юнион Сент-Жиллуазға» қарсы дербиге ауып отыр.
Walfoot өз сенімдерін команданың ойын формасының жақсаруымен байланыстырады. Бельгия құрамасының бұрынғы қақпашысы Жан-Мари Пфафф соңғы апталарда «Андерлехттің» ілгерілеуін атап өтіп, қазіргі уақытта клубты бағаламауға болмайтынын айтты.
Бельгиялықтардың бас бапкері Витор Бруну БАҚ өкілдерінен өзгеше пікір білдіріп, ойыншыларды барынша жинақы болуға шақырды. Алғашқы кездесуден кейін ол қарымта матчта да «Қайратқа» дәл сондай құрметпен қарайтынын атап өтті.
Француздың PenseBet ресурсы алматылықтардың еурокубоктардағы голсыз сериясына назар аударды. «Қайрат» турнирдегі соңғы үш матчында — «Левскиге» қарсы екі ойында және «Андерлехтпен» кездесуде — гол соға алмады.
RDC Sport қазақстандық клубтың «Андерлехттің» өз алаңындағы осал тұстарын пайдаланып кетуіне аз да болса мүмкіндігі бар екенін жоққа шығармайды. Алайда камбэк жасау үшін «Қайрат» үлкен тәуекелге баруы керек, бұл өз кезегінде қорғаныста қосымша мәселелер туындатуы мүмкін.
Келесі кезеңге өту үшін алматылық команда кем дегенде үш гол айырмасын жоюы қажет.
