УЕФА «Аталантамен» сенсациялық матчтан кейін Темірлан Анарбековтың сейвін атап өтті
Еуропа футбол қауымдастықтары одағы (УЕФА) Конференциялар лигасының жалпы кезеңіндегі үшінші турда италиялық «Аталантаға» қарсы өткен матчтан кейін алматылық «Қайраттың» қақпашысы Темірлан Анарбековтың ойынына назар аударды, деп хабарлайды Sports24.kz.
Турнирдің Instagram желісіндегі ресми парақшасында ұйым ойын күніндегі қақпашылардың үздік сейвтерін жариялады. Олардың қатарында 23 жастағы қазақстандық голкипердің сейвтерінің бірі де бар.
«Үшінші турда бірнеше керемет сейв жасалды! Үздік сейвті кім орындады – Анарбеков, Бакхаус, Ройс, Кокубо, Лундин, Дроммел әлде Ханкинс пе?» – делінген УЕФА жарияланымында.
Осылайша, Анарбеков жанкүйерлерге бағалау ұсынылған жеті қақпашының қатарына енді.
«Қайраттың» «Аталантаға» қарсы 6 қарашаға қараған түні Бергамода өткен кездесуі 1:1 есебімен аяқталды. Матч барысында Анарбеков өз есебіне алты сейв жазды. 53-минутта Марк Гуаль есеп ашса, 82-минутта Никола Крстович таразы басын теңестірді.
Айта кетейік, УЕФА осы турнирдегі қазіргі маусымда қазақстандық қақпашының ойынын екінші рет атап өтіп отыр. Бірінші турдан кейін ұйым Анарбековтің Латвияның «Ригасына» қарсы сырт алаңдағы матчта (1:1) қайтарған пенальтиін үздік сейвтер топтамасына енгізген болатын.
Үш турдан кейін «Қайраттың» еншісінде екі ұпай бар. Алматылықтар Конференциялар лигасындағы келесі матчын 26 қарашада өз алаңында швециялық «Мьельбюға» қарсы өткізеді.
