Тренер «Бернли» сынға алды, бірақ Сатпаевты ерекше атап өтті
Англиялық «Бернлидің» бас бапкері Ники Хайен Чемпионшиптің 3-туры аясында «Норвичтен» 1:4 есебімен ойсырай жеңілгеннен кейін Дастан Сатпаевты мақтады, деп хабарлайды Sports24.kz.
Жаттықтырушының айтуынша, Қазақстан құрамасының 18 жастағы шабуылшысы сәтсіз өткен матчта алаңдағы ең үздік ойыншы болды.
«18 жастағы Сатпаев алаңдағы ең үздік ойыншы болған кезде, қалған футболшылар өздеріне бірнеше сұрақ қоюы керек. Оның алаңға қандай энергия әкелгеніне, команда үшін қалай күрескеніне қараңыздар. Біздің команданың әр ойыншысы дәл осылай әрекет етуі керек.
Біз жақсара түсеміз. Бұл – ұзақ процесс, және біз өз мақсатымызға жетеміз. Дегенмен мен үшін бұл ауыр процесс. Жанкүйерлердің көңілі қалды, мен оларды толық түсінемін. Мен де маусымның басталуын мүлде басқаша елестеткен едім. Бірақ бәрін түзететінімізге кепілдік беремін», – деді жаттықтырушы матчтан кейін.
Еске салайық, кеше Чемпионшипте «Норвичке» қарсы өткен кездесуде Дастан Сатпаев «Бернли» сапында тұрақты чемпионаттағы алғашқы матчын негізгі құрамда бастады. Бұл оның жаңа командадағы үшінші ойыны болды.
Ойын команданың жеңілісімен аяқталып, есеп 1:4 болды. Бұл ретте қазақстандық шабуылшы алаңда толық 95 минут өткізіп, командадағы ең жоғары бағаға ие болды.
