Тодд Боули «Челсиден» кететінін жариялады. Оның тұсында Сатпаевқа келісімшарт жасалды
Лондондық «Челсидің» төрағасы Тодд Боули қызметінен кетеді. Америкалық кәсіпкер клубтағы жұмысының қорытындысын шығарып, мәлімдеме жасады, деп хабарлайды Sports24.kz.
Боули Clearlake инвестициялық компаниясымен бірлескен жұмысты атап өтіп, «Челсидің» одан әрі дамитынына сенім білдірді.
«Мен үшін «Челси» футбол клубының төрағасы қызметін атқару үлкен мәртебе болды. Клубтың жарқын болашағын қамтамасыз етуге атсалысқан барша адамға, соның ішінде Англия Премьер-лигасына, жаттықтырушылар мен ойыншыларға, «Челсидің» дарынды басшылығы мен қызметкерлеріне, сондай-ақ клубқа шексіз берілген сансыз жанкүйерлер легионына алғыс айтқым келеді. Clearlake-пен және иелердің кең ауқымды тобымен серіктестігімді, сондай-ақ клубтың қысқа және ұзақ мерзімді табысын қолдау үшін қабылдаған ортақ шешімдеріміз бен инвестицияларымызды жоғары бағаладым. Clearlake басшылығымен «Челси» бұдан әрі де үлкен жетістіктерге жетуге жақсы дайындалғанына сенімдімін», - деді ол.
Clearlake консорциумы, Боули, Уолтер және Висс «Челсиді» Роман Абрамовичтен 2022 жылдың мамыр айында сатып алды. Клубтың құны 2,5 млрд фунтты құрады, ал жаңа иелері оның дамуына тағы 1,75 млрд фунт инвестиция салуға міндеттеме алды. Команданы 2003 жылдан бері иеленіп келген Абрамовичке Ұлыбритания санкция салғаннан кейін клуб сатылды.
Тодд Боули және Дастан Сатпаев
Тодд Боули «Челсидің» төрағасы қызметін атқарған кезеңде лондондық клуб екі халықаралық жүлдеге ие болды. 2024/25 маусымында команда Конференциялар лигасында жеңіске жетіп, кейін жаңартылған ФИФА клубтар арасындағы әлем чемпионатының алғашқы жеңімпазы атанды. Боулидің кезеңі белсенді трансферлік науқанымен де есте қалды.
2022–2024 жылдары «Челси» әлемнің түкпір-түкпірінен 41 футболшыға келісімшарт жасады. Америкалық басшылықтың алғашқы жылдарындағы жұмыстың нәтижесінде лондондық клубтың құрамы әлем футболындағы ең қымбат командаға айналды.
Боулидің тұсында Қазақстан футболы үшін тарихи трансфер де жүзеге асты. «Челси» Дастан Сатпаевты «Қайраттан» сатып алып, 2026 жылдың жазында қазақстандық шабуылшымен ресми келісімшартқа отырды.
