Қатаң мәлімдеме: журналист Уразбахтин мен Бабаян арасында жекпе-жек ұйымдастыруға дайын
ҚПЛ-ның 27-туры аясындағы «Астана» — «Қайрат» (1:0) матчынан кейін Григорий Бабаян мен Рафаэль Уразбахтин арасындағы сөз тартысынан соң журналист Арман Тынымов ҚПЛ алпауыттарының жаттықтырушылары арасында жекпе-жек ұйымдастыруға дайын екенін мәлімдеді, деп хабарлайды Sports24.kz.
MatchKz ресурсының редакторы жекпе-жек үшін әр жаттықтырушыға 15 миллион теңгеден гонорар ұсынбақ. Егер олар өзара қарым-қатынасын рингте анықтауға дайын болса, ол жекпе-жекті ұйымдастыру үшін бар күшін салмақ:
«»Қайраттың» бас бапкері Рафаэль Уразбахтин «Астанамен» өткен матчтан кейін: «Шапито» деді. Бұған жауап ретінде Григорий Бабаян оны клоун деп атады. Сіздерге жекпе-жек ұйымдастыруға дайынмын! Гонорарды кейін талқылаймыз — әрқайсыңызға шамамен 15 миллион теңгеден. Егер келіссеңіздер, бүгін-ақ демеушімен барлық жайтты талқылап, жекпе-жек келісімшарттарын жіберуге дайынмын. Қалай ойлайсыздар, бұл жекпе-жекте кім жеңер еді?» — делінген жазбада.
Еске салайық, Бабаян мен Уразбахтин арасындағы сөз тартысқа «Астананың» бас директоры Алтай Даумов та реакция білдіріп, Алматы командасының бапкері тарапынан болған мұндай қызу реакцияның себебін түсінбейтінін айтқан еді.
