«Спартактың» бұрынғы бапкері Армениямен матчта Қазақстанға басымдық берді
Мәскеулік «Спартактың» бұрынғы бас бапкері, сондай-ақ армяндық «Ноа» мен «Урарту» клубтарындағы жұмысы арқылы танымал Дмитрий Гунько Sports24.kz-ке берген сұхбатында Қазақстан құрамасының алдағы Армениямен өтетін жолдастық матчындағы мүмкіндіктері туралы пікір білдірді.
Айта кетейік, Қазақстан құрамасы сенбі, 6 маусым күні, Ереванда Арменияға қарсы жолдастық матч өткізеді. Талғат Байсуфиновтың командасы үшін бұл кездесу Венгрияға қарсы сырт алаңдағы ойын алдындағы екі маусымдық сынақтың алғашқысы болмақ.
«Қазақстан құрамасы туралы айтсам, Магомед Адиев жұмыс істеген кезеңде командада өсім болды, белгілі бір жетістіктерге жетті. Кейін құрамды жасарту кезеңі басталды, ол кезде бас бапкер болған Станислав Черчесов еді. Қазір Армения құрамасы да қайта құрылу кезеңін бастан өткеріп жатыр. Жас ойыншыларға өздерін көрсетуге мүмкіндік туса, Еуропада сұранысқа ие көшбасшылар — Эдуард Сперцян сынды ойыншылар бар. Армения құрамасында көшбасшылардың бірі Угочукву Иву мен Степа Мкртчян бұл матчта ойнай алмайды, бұл өзге футболшыларға өзін көрсетуге, жаттықтырушылар штабына лайықты екенін дәлелдеуге мүмкіндік береді», – деді Дмитрий Гунько.
Сперцян – Қазақстан құрамасына басты қауіп пе?
Маман Армения құрамасының шабуыл шебіндегі негізгі ойыншысы Эдуард Сперцян Қазақстанға қарсы матч алдында ең үздік формасында болмауы мүмкін екенін атап өтті.
«Эдуард Сперцян үшін бұл өте ауыр маусым болды, Ресей чемпионатындағы чемпиондық жарыс «Краснодардың» пайдасына шешілмеді. Сондықтан эмоционалдық тұрғыдан да, чемпионаттың ауыртпалығы оған өз деңгейіндегі футбол көрсетуге кедергі болуы мүмкін. Наир Тикнизянның маусымы сәл жарқын өтті, ол – команданың көшбасшысы. Матч басталғанға дейін екі команданың да мүмкіндігі тең, алайда қағаз жүзінде басымдық Армения құрамасында емес. Себебі жарақат алғандар көп, шабуылшылар жоқ. Қағаз жүзінде басымдық Қазақстан құрамасында, ал футбол бәрін өз орнына қояды», – деп қосты Дмитрий Гунько.
Еске салайық, Армения мен Қазақстан құрамалары арасындағы жолдастық кездесу 6 маусым күні Еревандағы Вазген Саркисян атындағы республикалық стадионда өтеді. Бұған дейін Sports24.kz журналистері алдағы матч алдындағы басты сандарды жинақтаған болатын.
