СҰМДЫҚ: «Қайрат» пен «Панатинаикос» арасындағы матч ойсырата жеңіліспен аяқталды
Конференциялар лигасы жалпы кезеңінің екінші турында «Қайрат» гректің «Панатинаикос» командасына қарсы матчта ойсырата жеңілді, деп хабарлайды Sports24.kz.
Ойын Рафаэль Уразбахтин шәкірттері үшін бірден жоспар бойынша өрбіген жоқ. Алаң иелері 24-минутқа дейін Висенте Таборда мен пенальтиді сәтті орындаған Сирил Дессерстің голдарынан кейін екі рет қақпадан доп шығаруға мәжбүр болды.
Кездесудің 30-минутында доп Темірлан Анарбековтың қақпасына тағы бір рет енді. Алайда бейнеқайталауды қарағаннан кейін гол офсайдқа байланысты есепке алынбады.
Екінші таймның басында алаң иелері үшінші голды жіберіп алды. Дессерс дубль рәсімдеді, содан кейін матч жеңімпазы туралы интрига біржола жойылды. 57-минутта Кингс Кангва есепті тіпті масқара жағдайға жеткізді. Ал алаң иелерінің жігерін Эльмин Растодер құм етті — 5:0.
Қазақстандық клубтың жауап ретінде жасай алғаны — матч соңында Исмаил Бекболаттың абырой голы ғана. Алматыдағы Орталық стадионның таблосы «Қайраттың» 1:5 есебімен күйзелісті жеңілісін тіркеді.
Осылайша, алматылық команданың Конференциялар лигасындағы екі турдан кейін еншісінде бір ұпай ғана қалды. Ал «Панатинаикоста» максималды көрсеткіш — алты ұпай.
5 қарашада Уразбахтин командасы сырт алаңда италиялық «Аталантаға» қарсы ойнайды. Конференциялар лигасының жалпы кезеңінде «Қайрат» сонымен қатар Крайова қаласының румыниялық «Университатейімен», нидерландтық «Твентемен» және швециялық «Мьельбюмен» кездеседі.
