Самородов «Спартакқа» ауысымының жүзеге аспауы туралы пікір білдірді
«Ахмат» шабуылшысы Максим Самородов өзінің мәскеулік «Спартакқа» ауысымының жүзеге аспауы туралы пікір білдірді, деп хабарлайды Sports24.kz.
Қазақстандық футболшы медициналық тексеруден өткенін растады, бірақ мәскеулік команданың ойыншысы атанбады. Шабуылшының айтуынша, Грозныйда қалғанына еш өкінбейді.
«Медициналық тексеруден өткенім рас па? Иә, мұны жасыратын ештеңе жоқ, бірақ, өкінішке қарай немесе бақытымызға орай, осылай болып, командада қалдым. Еш өкінбеймін. Қазір бұл туралы ойламаймын, осы команданың құрамындамын, жұмысымды жалғастырып жатырмын, командама пайдамды тигізуге тырысамын», – деді Самородов «Матч ТВ» эфирінде.
Айта кетейік, «Спартакқа» ауысымы жүзеге аспағаннан кейін Самородов РПЛ-дің 8-туры аясында махачкалалық «Динамоға» қарсы өткен матчтың үздік ойыншысы деп танылды. Қазақстан құрамасының ойыншысы «Динамоға» қарсы кездесуде нәтижелі пас беріп, сонымен қатар «Ахмат» футболшылары арасында матчтағы ең жоғары бағалардың біріне ие болды.
Бұған дейін Самородовтың мәскеулік клубқа ауысымының не себепті жүзеге аспағаны белгілі болған еді.
