Самородовтың «Спартакқа» ауысуының не себепті жүзеге аспағаны айтылды
Танымал ресейлік инсайдер Иван Карпов Максим Самородовтың мәскеулік «Спартакқа» ауысуының жүзеге аспау себебін атады, деп хабарлайды Sports24.kz.
Дереккөздің мәліметінше, мәскеулік және грозныйлық клубтар Қазақстан құрамасының вингерін трансферлеу шарттары бойынша өзара келісімге келе алмаған.
Тағы бір дереккөздің ақпаратынша, «Ахмат» пен «қызыл-ақтар» Самородовтың трансферіне қатысты барлық детальді келіскен, алайда «Спартакқа» ойыншының медициналық тексеруден өткен нәтижелері ұнамаған.
Бұған дейін шабуылшы болашақ трансфер алдында медициналық тексеруден өту үшін Мәскеуге аттанғаны және тараптардың келісімді рәсімдеуге дайын болғаны хабарланған еді.
Самородов 2024 жылдан бері «Ахмат» сапында өнер көрсетіп келеді. Ағымдағы РПЛ маусымында Максим алты матч өткізіп, әзірге гол соғып немесе нәтижелі пас бере алған жоқ. Оның грозныйлық клубпен келісімшарты 2028 жылдың маусым айының соңына дейін жарамды.
Станислав Черчесов жаттықтыратын «Ахмат» маусымды сәтті бастай алмады. Команданың жеті ойыннан кейін жеті ұпайы бар және РПЛ турнир кестесінде 11-орында келеді.
