Роналду әлемдік рекорд орнатты: португалиялық футболшы не істеді
Криштиану Роналду футбол тарихындағы тағы бір ерекше жетістікке қол жеткізді. «Әл-Наср» шабуылшысы Сауд Арабиясы чемпионатындағы матчта гол соғып, 25 маусым қатарынан кем дегенде бір рет мергендік танытқан алғашқы футболшы атанды, деп хабарлайды Sports24.kz.
Португалиялық жұлдыз команданың бұған дейінгі ойындарын өткізіп алған еді. Ал «Әл-Риядқа» қарсы кездесуде ол екінші таймда алаңға шықты. Роналду 62-минутта ойынға қосылып, 83-минутта қарсылас қақпасын дәл көздеді.
Кездесу «Әл-Насрдың» 4:0 есебімен ірі жеңісімен аяқталды. Роналдудан бөлек, Абдулела Аль-Амри, Анжело Габриэл және Жоау Феликс гол авторы атанды.
Бұл гол 41 жастағы футболшының клубтар мен Португалия құрамасы сапындағы ресми матчтарда соққан 977-голы болды. Енді оған мансабындағы 1000 голдық межеге жету үшін тағы 23 рет мергендік таныту қажет.
Алайда бұл жолы басты назар басқа көрсеткішке ауды. Роналду өзінің ерекше сериясын жалғастырып, қатарынан 25 маусымда гол соққан алғашқы футболшы ретінде тарихқа енді.
Бұл серия 2002/03 маусымында басталған. Сол кезде жас Криштиану Лиссабонның «Спортинг» клубында кәсіби деңгейдегі алғашқы голын соққан еді. Кейін ол «Манчестер Юнайтед», «Реал», «Ювентус», «Әл-Наср» сапында және Португалия құрамасында гол соғуды жалғастырды.
Осылайша, кәсіби мансабындағы алғашқы голынан кейін жиырма жылдан астам уақыт өтсе де, Роналду нәтижелілігін тоқтатқан жоқ. Ендігі үлкен меже - мансабындағы 1000-голға жету.
