Мартин «Ордабасыдың» Қазақстан Кубогының финалына шығуы туралы пікір білдірді
«Ордабасы» командасының бас бапкері Андрей Мартин Қазақстан Кубогының финалына шығу туралы пікір білдірді – бұл жетістік «Алтайға» қарсы қарымта жартылай финалдағы жеңістің арқасында мүмкін болды, деп хабарлайды Sports.kz.
«Ордабасы» жартылай финалдың екінші ойынында да қарсыласынан үстем түсті – 2:1 есебімен жеңіске жетті. Бірінші кездесуде де Мартин шәкірттері 3:1 есебімен басым түскен болатын.
«Ең алдымен, бүкіл команданы, клубты, Шымкент қаласын құттықтағым келеді. Барлық жанкүйерлерімізді кезекті финалға шыққанымызбен құттықтаймын. Қазақстан Кубогының финалдарында ойнау – клуб үшін аса маңызды. Бұл біз үшін өте қуанышты әрі үлкен мәртебе деп ойлаймын. Екінші жыл қатарынан финалдамыз – бұл ерекше жетістік. Тағы да жігіттерді жақсы, сенімді ойынмен құттықтаймын.
Ең бастысы – алға қойған міндетті орындадық, енді ары қарай жылжимыз. Тек есепті ұстап ойнау – қате тактика. Мұндай тәсіл әдетте жазасыз қалмайды. Сондықтан тағы да өз ойынымызға сүйендік, кейбір өзгерістер болғанымен, жалпы бақылауда ұстауға тырыстық, допты иемденуге, қауіпті сәттер жасауға ұмтылдық.
Әрине, бір жерлерде жақсы шықты, кей тұста кемшіліктер болды, бірақ жалпы алғанда жігіттердің өздерін қалай көрсеткеніне өте ризамын. Ең маңыздысы – бізге керек нәтижеге қол жеткіздік. Бұл жерде жеңілгіміз келмеді, жолымызды жалғастыруды қаладық, сондықтан команданың әрекеттеріне өте ризамын. Барлық жанкүйерлерге тағы да алғыс айтамын – олар әрдайым бізбен бірге, команданы қолдайды, ел бойынша бізбен бірге жүреді. Оларға үлкен құрмет, үнемі ойындарға шақырамыз, жақсы нәтижемен қуантамыз деп үміттенеміз», – деді маман.
Шымкенттік клуб өз тарихында үшінші рет ұлттық Кубокты жеңіп алуға тырысады. Финалда Мартин командасының қарсыласы Қызылордалық «Қайсар» болмақ. Қазақстан Кубогының трофейі 7 қараша күні Астанада сарапқа салынады.
