Ұлттық құрамадағы жанжал: байдың ұлын Қазақстан үшін ойнауға шақырды ма?
Қазақстан ұлттық құрамасы кезекті үзіліске жаңа есіммен шықты – «Жетісу» қорғаушысы Дінмұхаммед Қашкен құрама сапына шақырылды. Алайда бұл шешім жанкүйерлер арасында әртүрлі пікір туғызды.
25 жастағы футболшы үшін биылғы маусым оңай болған жоқ. Ол Қазақстан Премьер-лигасында барлығы 12 матч өткізіп үлгерді: бесеуін «Ұлытаудың» жейдесінде, жетеуін «Жетісу» сапында. Дегенмен, қарапайым статистикасына қарамастан, Қашкен алдағы ресми ойындар тізімінен орын алды.
Әлеуметтік желілерде жанкүйерлер орынды сауал қойып отыр: Қашкен ұлттық құрамаға несімен лайық болды? Көпшілігі бұл позицияға тұрақтырақ әрі тәжірибелі ойыншылар бар екенін алға тартып, бапкерлер шешімін даулы деп бағалады. Сондай-ақ сыншылар арасында «Қашкен құрамаға еңбегімен емес, дәулетті әке баласы болғандықтан шақыртылды» деген пікірлер де жиі айтылды.
Айта кетейік, Қазақстан құрамасы қазан айындағы үзілісте екі ресми матч өткізеді: 10 қазанда өз алаңында Лихтенштейнмен, ал 13 қазанда сырт алаңда Солтүстік Македониямен кездеседі.
