«Копенгаген» – «Қайрат» – 3:2. Қазақ жас таланттарының екі голы және қорғаныстағы сәтсізді. Голдар және матчқа бейнешолу
Алматылық «Қайрат» ЧЛ-ның бесінші туры аясында Данияның «Копенгаген» командасына қарсы маусымдағы ең драмалық ойындарының бірін өткізді. Кездесу жүйкеге салмақ салған, қарқыны үзіліссіз ауысқан, түрлі сипаттағы голдарға толы ерекше матч болды.
Ойынның алғашқы минуттарынан-ақ алаң иелері қарқын алып, бірінші тайм ортасына қарай есеп ашты. Орталық аймақ арқылы өрілген көпқадамды шабуылды Дадасон түйіндеп, «Копенгагенді» алға шығарды. «Қайрат» бастаманы өз қолына алуға тырысқанымен, шешуші пастың дәлдігі әр сәтте жетіспей жатты.
Үзілістен кейін кездесу екі бөлікке бөлінгендей көрінді: дат командасы шабуылын үдете түссе, алматылықтар қарсы шабуылдан өз мүмкіндігін іздеді. 58-минутта VAR шешімімен «Копенгагенге» пенальти беріліп, Ларссон айып добын суыққанды дәлдікпен орындады.
73-минутта Роберт есепті 3:0-ге жеткізгенде, ойын тағдыры оңайлықпен өзгермейтіндей көрінді.
Алайда «Қайрат» өзіне тән соңғы минуттардағы қайсар мінезін көрсетті. 17 жастағы Дастан Сатпаев айып алаңына шебер енген сәтте ЧЛ-дағы алғашқы голын соғып, үміт отын жақты. Ал қосымша уақытта алаңға тың күш боп қосылған Олжас Байбек айып алаңындағы қарбаласта дәл әрекет жасап, айырманы бір голға дейін қысқартты.
Алматылықтар соңғы секундтарға дейін шабуылдап, бар күшін салды, алайда уақыт қарсы шықты – матч 3:2 есебімен аяқталды.
Сіздердің назарларыңызға ойынның толық бейнешолуын ұсынамыз.
