«Хабар» еурокубок матчтарын көрсетеді: Чемпиондар лигасының ойындары қашан өтеді
«Хабар» телеарнасы УЕФА ұйымдастыратын үш бірдей еурокубок турнирінің матчтарын тікелей эфирде көрсететінін мәлімдеді. 24 қарашадан бастап жанкүйерлер Чемпиондар лигасының ойындарын тамашалай алады. Ал кейінірек Еуропа лигасы мен Конференция лигасының кездесулері де эфирге шығады, деп хабарлайды Sports24.kz.
Бұл туралы телеарнаның әлеуметтік желідегі ресми парақшасында жарияланды. Футбол жанкүйерлері матчтарды теледидардан бөлек, Khabar.kz сайты арқылы да онлайн көре алады.
Еурокубок бәсекелері жалпы кезеңнің шешуші бөлігіне жақындап келеді. Чемпиондар лигасында төрт турдан кейін басты фавориттер белгілі бола бастады. Дегенмен плей-офф жолдамалары үшін тартыс әлі алда. Әр команданың еншісінде тағы төрт кездесу бар.
Чемпиондар лигасының қазіргі жеңімпазы – Францияның «Пари Сен-Жермен» клубы. Париждіктер 2025/26 жылғы маусымның финалында Лондонның «Арсеналымен» негізгі уақытта 1:1 есебімен тең түсіп, пенальти сериясында 4:3 есебімен басым түсті. Осылайша ПСЖ құрлықтың басты клубтық додасында қатарынан екінші рет топ жарды.
Биылғы маусымда да француз клубы көш бастап тұр. Луис Энрике шәкірттері алғашқы төрт кездесудің барлығында жеңіске жетіп, 12 ұпай жинады. Мадридтің «Реалы» да дәл осындай нәтижеге қол жеткізгенімен, доп айырмашылығы бойынша париждіктерден кейін орналасқан. Ал он ұпайы бар «Арсенал» үздік үштікті түйіндеп тұр.
Чемпиондар лигасының бесінші туры 24–25 қараша күндері өтеді. Бұл кезеңде «Реал» ПСВ-мен, «Арсенал» Дортмундтың «Боруссиясымен», ал «Манчестер Сити» «Наполимен» кездеседі. Қазақстандық жанкүйерлер үшін Әзербайжанның «Сабах» клубы мен «Барселона» арасындағы ойынның да маңызы ерекше. Себебі Баку командасының қақпасын Қазақстан ұлттық құрамасының голкипері Стас Покатилов қорғайды.
Сондай-ақ отандық футболсүйер қауым үшін Конференция лигасында өнер көрсетіп жүрген Алматының «Қайратының» ойындары да қызықты болмақ. Қазақстандық клуб келесі кездесуін 26 қарашада Швецияның «Мьельбю» командасына қарсы өткізеді.
