«Алтыннан да қымбат»: Ясмина Токсанбаева дисквалификациядан кейін жүрекжарды мәлімдеме жасады
Қазақстандық жеңіл атлет Ясмина Токсанбаева 2026 жылғы Азия ойындарына қатысушыларды марапаттау рәсімінен кейін жүрекжарды мәлімдеме жасады, деп хабарлайды Sports24.kz.
Жабдыққа қойылатын талаптарды бұзғаны үшін алтын медалінен айырылған спортшы Жапонияда болған оқиғадан кейін отандастарының қолдауы өзі үшін айрықша құнды болғанын мойындады.
«Осындай қолдау мен құрметті сезінгенде, мұның бәрі алтыннан да қымбат болады», — деді Токсанбаева.
Қазақстандық спортшы қол жеткізген жетістіктерімен тоқтап қалмайтынын да аңғартты. Ауыр тиген дисквалификацияға қарамастан, ол жарыстарға қатысуын жалғастырып, халықаралық аренада жаңа жүлделер үшін күресуге ниетті.
«Бұл жай ғана мотивация емес, алға жасалған үлкен қадам. Мен тоқтамаймын», — деді жеңіл атлет.
Азия ойындарында Токсанбаева спорттық жүрістен марафондық қашықтықта сенімді жеңіске жетіп, ең жақын қарсыласынан төрт минутқа жуық озып кетті. Алайда кейін төрешілер World Athletics регламентіне сай келмеген кроссовкалары үшін оның нәтижесін жойды.
Қазақстанның жеңіл атлетика федерациясы дисквалификациямен келіспей, іс бойынша түпкілікті шешім қандай болса да, спортшыға чемпиондық сыйақы төлеуге уәде берді.
Қараша айында Токсанбаева мемлекеттік награда мен бір бөлмелі пәтердің кілтін алды. Федерация өкілдері оны Азия ойындарының нағыз чемпионы деп санайтынын атап өтті.
