Қазақстан футзал қауымдастығының президенті Беларусьтен жеңілгеннен кейін қызметінен кететінін мәлімдеді
Қазақстан футзал қауымдастығының президенті Нұрсұлтан Құрман қызметінен кететінін мәлімдеді, деп хабарлайды Sports24.kz.
Қабылдаған шешімі туралы функционер Instagram желісіндегі жеке парақшасында жазды. Құрман әріптестеріне бірлескен жұмысы үшін алғыс айтып, қауымдастықты басқарған кезеңнің өзі үшін маңызды кәсіби белес болғанын атап өтті.
«Бүгін өмірімнің маңызды кезеңдерінің бірі аяқталады. Қазақстан футзал қауымдастығының президенті қызметіндегі жұмысымды аяқтау туралы шешім қабылдадым», — деп жазды Құрман.
Ол Қазақстан футбол федерациясының президенті Марат Омаровқа сенім білдіріп, қолдау көрсеткені үшін ерекше алғыс айтты. Сонымен қатар функционер жұмыс істеген кезеңде ұйым жетістіктерге де жетіп, белгілі бір қиындықтарға да тап болғанын мойындады.
Құрман спорт саласындағы қызметін тоқтатуды жоспарламайтынын да атап өтті. Оның айтуынша, алда жаңа жобалар мен бастамалар күтіп тұр, олардың егжей-тегжейін кейінірек бөліседі.
«Бұл қоштасу емес, жаңа кезеңнің бастауы. Футзалға деген сүйіспеншілігім мен осы спорт түрін қолдауым әрдайым сақталады», — деді функционер.
Еске сала кетейік, Құрман Қазақстан футзал қауымдастығын 2025 жылдың шілдесінде басқарды. Бұған дейін ол ұйымның вице-президенті қызметін атқарып, ҚФФ президентінің кеңесшісі болып жұмыс істеген.
Қызметінен кететіні туралы мәлімдеме Қазақстан құрамасының Беларусьтен 1:5 есебімен ірі жеңіліс тапқанынан кейін жарияланды. Алайда Құрман отставкаға кету туралы шешімін ұлттық құраманың нәтижесімен байланыстырған жоқ.
