Флик «Барселонаның» Чемпиондар лигасында ПСЖ-дан жеңілуіне қатысты пікір білдірді
«Барселонаның» бас бапкері Ханс-Дитер Флик Чемпиондар лигасы матчында «Пари Сен-Жерменнен» жеңілгеннен кейін пікір білдірді, деп хабарлайды Sports24.kz.
Германиялық маман командасының допқа иелік ету кезіндегі қателіктерін атап өтті, сонымен қатар каталондықтардың ойынындағы жағымды тұстарға да тоқталды.
«Менің ойымша, бұл екі команда үшін де фантастикалық ойын болды. Біз көп қателік жібердік, әсіресе допқа иелік ету кезінде қарапайым доп жоғалтуларға жол бердік. Бұл — біз талдап, түзетуіміз керек нәрсе. Дегенмен, мен жақсы тұстарды да көп көрдім. Біз үшін бұл қай аймақтарда қосуымыз және нені жақсартуымыз керектігін көрсеткен тамаша сынақ болды. Біз дәл осымен айналысамыз», - деді Флик.
Бапкер футболшылардың физикалық жағдайы ойын сапасына әсер етуі мүмкін екенін де түсіндірді. Алайда ол шаршауды сылтау ретінде пайдаланбайтынын атап өтті.
«Біріншіден, бұл ақтау емес екенін айтқым келеді. Балғындықтың жетіспеуінен де қателіктер болатынын түсінуіміз керек. Команданың соңғы бірнеше аптада атқарған жұмысы — керемет. Мен футболшылардың мінез-құлқын және іске деген көзқарасын өте жоғары бағалаймын», - деп атап өтті маман.
Фликтің айтуынша, «Севильямен» өткен матчтан кейін команда толыққанды қалпына келе алмаған. Соған қарамастан, «Барселона» өзінің ойын стилін ұстануға тырысып, жоғары прессингте белсенді әрекет етті.
«Бүгін доп жоғалтуларға байланысты оңай болған жоқ. Бүкіл команда болып дерлік қорғанысқа қайтуға тура келді, бірақ біз өз футболымызды ойнауға тырыстық. Жоғары прессинг қолдандық, бұл керемет болды. Барлық испаниялық журналистер «Севильямен» өткен матчтан кейінгі қалпына келудің мінсіз болмағанын біледі. Қайталап айтамын, бұл ақтау емес, тек бүгінгі ойында неліктен, мүмкін, бабымыздың шыңында болмағанымыздың түсіндірмесі», - деді Флик.
Сөз соңында бапкер команда маусымға ұзақмерзімді тұрғыдан қарайтынын және бір матчтан кейін асығыс қорытынды жасамайтынын атап өтті.
«Соған қарамастан, біз жақсы деңгей көрсеттік. Жанкүйерлер үшін де бұл тамаша шоу болды деп ойлаймын. Тағы бір нәрсені айтқым келеді: трофейлер қазан айында, әсіресе Чемпиондар лигасының жүлдесі ұтылмайды. Бұл трофейлер маусым айында сарапқа салынады. Біз маусымға дәл осылай қараймыз, сондықтан қадам-қадаммен алға жылжимыз. Басқаша болуы мүмкін емес», - деп түйіндеді «Барселона» бапкері.
Еске салайық, ПСЖ Чемпиондар лигасының матчында «Барселонаны» алты гол соғылған тартыста 4:2 есебімен жеңді.
ПСЖ мен «Барселона» Чемпиондар лигасының суперматчында голды шоу ұйымдастырды
