Almaty Open: Маннарино Рублевті жарыстан шығарды, ал Дакворт Дардериді сенсациялық түрде жеңді
Алматыда өтіп жатқан ATP 250 Almaty Open турнирінің негізгі кезеңінде кезекті матчтар ойналды. Франциялық Адриан Маннарино төртінші нөмірлі Андрей Рублевті үш сетте жеңсе, австралиялық Джеймс Дакворт Италия өкілі, екінші нөмірлі Лукаано Дардериден басым түсті, деп хабарлайды Sports24.kz.
Дакворт Almaty Open турнирінің екінші нөмірлі теннисшісін жеңді
Австралиялық Джеймс Дакворт Алматыдағы турнирдің келесі кезеңіне жолдама алды. Ол италиялық Лучано Дардериді 7:5, 7:6 (11:9) есебімен ұтты.
Теннисшілер кәсіпқой деңгейде алғаш рет кездесті. Дакворт доп қабылдауда сенімді ойнап, 17 эйс жасады және бірінші доптан кейінгі ұпайлардың 88 пайызын жеңіп алды.
Матчтен кейін австралиялық Алматыдағы жарыстың ұйымдастырылуы мен жағдайларын жоғары бағалады.
«Ең алдымен, бұл турнирдің керемет екенін айтқым келеді. Мұнда ойыншыларға өте жақсы қамқорлық көрсетіледі: қонақжайлық, тамақтану, массажистер, ойыншылармен жұмыс істейтін қызметкерлер — бәрі өте ықыласты әрі жылы шырайлы. Оның үстіне кофесі де керемет. Алматыға қайта келген маған шынымен ұнайды. Мен жабық ғимаратта, әсіресе теңіз деңгейінен биіктігі аса үлкен емес жерде ойнағанды жақсы көремін. Мен үшін ең қолайлы жағдайлардың бірі осы деп ойлаймын, бұл екі фактор да жақсы теннис көрсетуіме көмектеседі», — деді Дакворт.
Дардери жеңілгеніне қарамастан, өз өнеріне риза болды. Итальяндық жабық ғимараттағы жылдам хардтағы ойынның ерекшеліктерін атап өтіп, қарсыласының допты мінсізге жуық бергенін мойындады.
«Меніңше, бұл шынымен жақсы матч болды, әсіресе мұнда алғаш рет ойнағанымды ескерсек. Қарсыласым осы турнирде жақсы нәтижелерге қол жеткізген, сондықтан жергілікті жағдайларға бейімделген. Бүгін ол допты мінсізге жуық берді. Екінші сетте менде пайдалануға шамам жетпеген бірнеше мүмкіндік болды. Бірақ теннистің табиғаты осындай. Өз ойыныма және көрсеткен нәтижеме ризамын. Бұл маусымдағы жабық ғимараттағы алғашқы турнирім, алда тағы екеуі бар, келесі жарыстар алдында өзімді сенімді сезініп тұрмын. Қазір мен шынымен жақсы теннис көрсетіп жүрмін», — деді итальяндық.
Маннарино Рублевті Алматыдағы турнирден шығарды
Тағы бір матчта франциялық Адриан Маннарино жарыстың төртінші нөмірлі теннисшісі Андрей Рублевті жеңді. Кездесу француз теннисшісінің пайдасына 6:4, 3:6, 6:3 есебімен аяқталды.
Маннарино жазық соққыларға, ойын қарқынын өзгертуге және артқы шепте тұрақты ойнауға басымдық берді. Бұл тактика оған ресейлік теннисшінің агрессивті әрекеттерін бейтараптандыруға мүмкіндік берді.
Рублев екінші сетте 6:3 есебімен жеңіске жеткенімен, шешуші партияда француз ойыншысы бастаманы қайта қолға алды. Маннарино бірінші доптан кейінгі ұпайлардың 77 пайызын жеңіп, қабылдаудағы маңызды мүмкіндіктерін пайдаланды да, қорытынды есепте 6:3 басым түсті.
Матчтен кейін Рублев турнир апталығы аясындағы әлеуметтік бастамаға қатысуы туралы да айтып берді. Ресейлік теннисші аутизмі бар балалармен кездесіп, осы шарадан алған әсерімен бөлісті.
«Бұл мен үшін өте құнды тәжірибе. Балалар адамға көп нәрсе үйретіп, кейде бетпе-бет келгің келмейтін дүниелерді көрсетеді. Олармен теннис ойнағаным немесе ойнамағаным маңызды емес. Бірге немен айналысатынымыз да маңызды емес — бұл әрдайым ерекше тәжірибе, өйткені олардан көп нәрсе үйренуге болады», — деді Рублев.
Осылайша, Маннарино Almaty Open турниріндегі өнерін жалғастырады, ал Рублев титул үшін күресін аяқтады. Ал Дакворт жарыстың негізгі фавориттерінің бірін жеңіп, келесі кезеңге өтті.
Қазақстан бойынша спутниктермен жұмыс істейтін алғашқы ғарыштық мобильді байланыс — Starlink-пен Direct to Mobile технологиясының арқасында тек Beeline клиенттеріне қолжетімді.
