ҚФФ «Тобыл» — «Қайсар» матчы бойынша шешім қабылдады
Қазақстан футбол федерациясы Премьер-лиганың 21-турындағы «Тобыл» мен «Қайсар» арасындағы матчтың ауыстырылғанын хабарлады, деп жазады Sports24.kz.
Қазақстан Кубогының қазіргі иегері Конференциялар лигасының үшінші іріктеу кезеңінде сербиялық «Партизанмен» өтетін матчтар арасында демалыс алады және сол себепті жоспарланған уақытта «Қайсарға» қарсы ойнамайды.
Айта кетейік, бұған дейін қызылордалық клуб матчты ауыстырудан бас тартып, оның себебін логистикалық қиындықтармен, атап айтқанда, Қостанайға ұшуға және қонақүйге төлем жасалып қойғанымен түсіндірген еді. Кейін «қасқырлар» басшылығы матчты ауыстыруға келісім бергенімен, оны 24 немесе 25 тамызда өткізуді ұсынды. Бұл нұсқа енді ҚФФ-қа ұнамай, әзірге ойынның жаңа күні белгісіз. Матч бастапқыда 9 тамызға жоспарланған болатын.
Осылайша, Виктор Мозес пен оның командасы келесі кездесуін тек 15 тамызда, өз алаңында «Ақтөбені» қабылдай отырып өткізеді. «Тобыл» болса, 13 тамыз күні Қостанайда өтетін Конференциялар лигасының үшінші іріктеу кезеңіндегі «Партизанға» қарсы қарымта ойынға дайындалуда. Белградта өткен алғашқы матч сербтердің сенімді 3:0 есебімен жеңісімен аяқталды.
