«Ешкім футболды сатпайды»: FIFA әлем чемпионатының құқықтары бойынша жағдайға қатысты мәлімдеме жасады
FIFA әлем чемпионатын және басқа да ірі турнирлерді өткізу құқығына қатысты акциялардың жекеменшік құрылымдарға сатылу жағдайына байланысты ресми мәлімдеме жасады, деп хабарлайды Sports24.kz.
«FIFA жария кеңістікте айтылған пікірлер мен алаңдаушылықтарды мойындайды әрі құрметтейді. FIFA ашық әрі демократиялық кеңес беру процесіне адалдығын растайды. БАҚ-тағы жалған хабарламалар жоспарланған талқылау үдерісін тоқтатты. Біз ұсынылған FIFA Forward Enterprise (FFE) құруға қатысты тиісті конфедерациялардың пікірлерін тыңдадық.
Біз талқылауды жалғастыра отырып, FIFA-ға мүше әрбір ассоциацияның өз пікірін фактілер негізінде білдіру мүмкіндігі бар екенін көрсеткіміз келеді. FFE тек FIFA-ның барлық мүшелік ассоциациялары өз елдерінде футболдың коммерциялық әлеуетінен елеулі үлес алуына мүмкіндік беру үшін ұсынылды», - делінген FIFA мәлімдемесінде.
Сонымен қатар, бұл қадам ешбір жағдайда FIFA-ның немесе футболдың жалпы басқару жүйесі мен рухына қайшы келмеуі тиіс екені аталып өтілді.
«Ешкім футболды сатпайды. FIFA мұндай ұсынысты ешқашан қарастырмайды. Әркім келіспеушілігін білдіріп, қосымша түсініктеме сұрауға құқылы, бірақ ешбір ұйым FIFA-ның 211 халықаралық ассоциациясының барлығын өкілдік етуге таласа алмайды. Әр ассоциацияға ұсынысты мұқият қарап, өз болашағына қатысты пікірін айту құқығы берілуі тиіс.
Бұл – FIFA-ның демократиялық қағидаттары. FIFA іс-шараларды ұйымдастырудағы коммерциялық және операциялық қызметті өз еншілес ұйымы – FFE-ге тапсырады. Бұл ұйым толықтай FIFA-ға тиесілі болады және тұрақты түрде оның бақылауында қалады. Түскен табыс 211 халықаралық ассоциацияның бәріне бөлінеді, бұл әр елдің футболына қомақты инвестиция салуға мүмкіндік береді», - деп толықтырды FIFA өкілдері.
Мәлімдемеде айтылғандай, көпшіліктің қолдауы болмаса, FIFA-ның коммерциялық қызметі өзгеріссіз қалады.
«FFE бағдарламасы құрылмайды. Ұсыныстар толықтай немесе жеке-жеке мақұлдануы, қабылданбауы немесе өзгертілуі мүмкін. Біз кеңес беру процесін бастаймыз және диалогқа ашықпыз», - деп қорытындылады ұйым.
Еске сала кетейік, бұған дейін УЕФА мен КОНКАКАФ алдағы реформаларды бірауыздан бойкоттауға шешім қабылдады. Бұл ұйымдарға мүше елдер жаңашылдықтар қабылданатын болса, жарыстарды бойкоттайтындарын мәлімдеді.
Бұған дейін The Times газеті FIFA президенті Джанни Инфантино әлем чемпионатының коммерциялық құқықтарының үлесін жеке инвесторларға сатуды жоспарлап отырғанын хабарлаған еді. Бұл жоспар Infantino-ға ондаған миллион доллар табыс әкелуі мүмкін делінеді. Жоспарға сәйкес, FIFA-ның негізгі ерлер және әйелдер жарыстары – әлем чемпионаты мен клубтық әлем чемпионатын басқаратын компания құру қарастырылған. Сондай-ақ, ұйым АҚШ президенті Дональд Трамп әкімшілігіне жақын адамдармен кеңескені айтылған.
