ФИФА аға кеңесшісі ірі жанжалға байланысты отставкаға кетті
ФИФА президенті Джанни Инфантиноның төңірегіндегі дағдарыс күн санап ушығып барады, деп хабарлайды Sports24.kz тілшісі.
ФИФА-ның аға кеңесшісі Карлос Кордейро өз еркімен отставкаға кеткенін ресми түрде мәлімдеді. Ол жеке инвесторларды ФИФА турнирлеріне тартуға бағытталған FIFA Forward Enterprise (FFE) жобасына түбегейлі қарсы екенін ашық айтты.
Бен Джейкобстың мәліметінше, Инфантино өзінің ең сенімді серіктерінің бірінің қолдауынан айырылды. АҚШ футбол федерациясының бұрынғы президенті Кордейро бұл даулы бастамаға еш қатысы жоқ екенін және оған үзілді-кесілді қарсы екенін жария түрде мәлімдеді.
«ФИФА президентінің аға кеңесшісі, бұрынғы банкир әрі адал футбол жанкүйері ретінде мен ФИФА әлем чемпионатындағы үлесті сату мәселесін қарастырып жатқанда, бұған бейжай қарай алмаймын», — деп мәлімдеді Кордейро.
Сондай-ақ ол жобаның өзін қатты сынға алды:
«Ашық айтайын: бұл ұсынысқа менің еш қатысым жоқ және оған түбегейлі қарсымын. Бұл — ФИФА-ға мүше қауымдастықтар үшін де, футбол үшін де, осы спорттың ұзақмерзімді болашағы үшін де тиімсіз мәміле».
Инфантиноның басты кеңесшілерінің бірі қызметтен кетуі оның басшылығына тағы бір ауыр соққы болды. Бұған дейін УЕФА, КОНКАКАФ және Азия футбол конфедерациясы (АФК) ФИФА бастамасына қарсы пікір білдіріп, әлемдік футболды басқаратын ұйымға қысымды күшейткен еді.
Бұған дейін ФИФА чемпионат пен басқа да ірі турнирлердің үлес құқығын жекеменшік құрылымдарға сату туралы жағдайға байланысты ресми мәлімдеме жасаған болатын.
