Чехия әлем чемпионатында ОАР-ды жеңе алмады
Чехия мен Оңтүстік Африка Республикасы құрамалары әлем чемпионаты-2026 топтық кезеңінің екінші турында тең түсті, деп хабарлайды Sports24.kz.
Кездесу 1:1 есебімен аяқталды. Чехия құрамасы матчтың алтыншы минутында алға шықты. Команда сапынан Садилек мергендік танытты. Чехтар ұзақ уақыт бойы жеңісті ұстап тұрғанымен, ойын соңында қарсылас есепті теңестіріп кетті.
83-минутта ОАР құрамасының жартылай қорғаушысы Мокоэна пенальтиді дәл орындап, өз командасын жеңілістен құтқарды.
Әлем чемпионаты-2026. А тобы. Екінші тур
Чехия - Оңтүстік Африка Республикасы - 1:1
Голдар: Садилек, 6 - Мокоэна, 83 (пенальти).
Екі құрама үшін де бұл турнирдегі екінші матч болды. Бірінші турда Чехия Оңтүстік Кореяға 1:2 есебімен жол берсе, Оңтүстік Африка Республикасы Мексикадан 0:2 есебімен жеңілген еді.
Осылайша, Чехия мен ОАР әлем чемпионатындағы алғашқы ұпайларына қол жеткізді. Дегенмен, екі команда да плей-офф кезеңіне шығу үшін келесі турда оң нәтижеге қол жеткізуі қажет.
