Бауыржан Исламхан Қазақстан құрамасына оралуы туралы айтты
«Астана» клубының жартылай қорғаушысы Бауыржан Исламхан ұзақ үзілістен кейін Қазақстан құрамасына қайта оралуы туралы пікір білдірді. Футболшы ұлттық команда сапында тағы бір мүмкіндік алғанына қуанышты екенін айтып, берілген сенімді ақтауға бар күшін салатынын жеткізді.
«Ең алдымен, құрамаға қайта оралғаныма өте қуаныштымын. Маған сенім артып, ұлттық командаға қайта шақырғаны үшін бапкерлер штабына алғыс айтамын. Ал соңғы жеңіске келсек, барлық жанкүйерімізді құттықтаймын», - деді Исламхан.
33 жастағы жартылай қорғаушы үшін бұл оралудың маңызы ерекше. Исламхан жарақатына байланысты алаңнан тыс қалған кезеңнің өзінде ұлттық құрамаға қайта оралу мақсатын ұмытпағанын атап өтті.
«Айтқым келгеннің бәрін сөзбен емес, алаңда көрсеткім келеді. Жарақат алып жүрген кезімнің өзінде құрамаға қайта оралғым келетінін айтқанмын. Енді маған тағы бір мүмкіндік берілді. Осы мүмкіндікті жүз пайыз пайдалануға тырысамын», - деді футболшы.
Исламхан Қазақстан футболындағы жаңа буын туралы да сөз қозғады. Тәжірибелі ойыншы жас футболшылардың шетел чемпионаттарына жол тартып, жаңа деңгейде өздерін сынап жатқанына қуанышты екенін айтты.
«Мен де кезінде құрамаға өте жас болып келдім. Уақыттың қалай тез өткенін байқамай қаласың. Қазір жастарымыздың басқа чемпионаттарға барып, тәжірибе жинап жүргені қуантады. Жақсы деңгейдегі ойыншыларымыз көбейіп келеді. Енді аға буынның өкілі ретінде оларға тәжірибеммен бөлісіп, қолдан келгенше көмектескім келеді. Жастарымыз жақсы нәтиже көрсетсе, одан ұлттық құрама да ұтады», - деді Исламхан.
Ұлттық құрамаға шақырту алар алдында Исламхан ҚПЛ-дың 27-туры аясындағы орталық кездесулердің бірінде алаңға шықты. Ол «Қайратқа» қарсы ойында «Астананың» негізгі құрамында бастап, 81 минут ойнады. Кейін оның орнына Александр Меркель шықты. Елордалық клуб кездесуде 1:0 есебімен жеңіске жетті.
Исламхан Қазақстан құрамасында 2012 жылдан бері өнер көрсетіп келеді. Қазіргі шақыртуға дейін ол ұлттық команда сапындағы соңғы кездесуін 2024 жылғы 17 қарашада Ұлттар лигасында Норвегияға қарсы өткізген. Жалпы жартылай қорғаушы Қазақстан құрамасы сапында 56 матчқа қатысып, төрт гол соққан және он нәтижелі пас берді.
