«Қайрат» «Левскиден» өтсе, қарсыласы анықталды
3 тамыз күні Чемпиондар лигасының іріктеу плей-офф кезеңінің жеребесі тартылды. Осы рәсім барысында «Қайрат» болгариялық «Левскиден» өтсе, кіммен кездесетіні белгілі болды, деп хабарлайды Sports24.kz.
Егер алматылықтар болгариялық ұжымнан басым түссе, плей-офф кезеңінде олар гректің АЕК клубымен шеберлік байқасады. Бұл қарсыластар арасындағы ойындар 18/19 тамызда (алғашқы матч) және 25/26 тамызда (қарымта матч) өтеді. Алғашқы ойын «Левски» – «Қайрат» жұбының жеңімпазының алаңында ұйымдастырылады.
Еске сала кетейік, Чемпиондар лигасының плей-офф кезеңіне шыққан жағдайда, «Қайрат» автоматты түрде Еуропа лигасының топтық кезеңіне жолдама алады. Ал егер «Левскиден» өте алмаса, онда алматылықтар Еуропа лигасының плей-офф кезеңіне түседі.
Ол жердегі қарсылас 3 тамыз күні Астана уақытымен 16:00-де анықталады. Қазірдің өзінде алматылық командаға қарсылас болуы мүмкін командалардың тізімі жарияланды.
Айта кетейік, «Қайрат» пен «Левски» арасындағы Чемпиондар лигасы плей-офф кезеңіне өтетін команданы анықтайтын ойындар 4 тамызда (бірінші матч) және 11 тамызда (қарымта матч) өтеді.
Бірінші ойын Болгария астанасы Софияда, ал қарымта матч Алматыда емес, Түркістандағы «Түркістан Аренада» өтеді.
