ҚФФ «Ордабасыға» Слоттың тағайындалуы туралы қауесетке пікір білдірді
Қазақстан футбол федерациясының бас хатшысы Скотт Манн нидерландтық танымал маман Арне Слоттың Шымкенттің «Ордабасы» клубының бас бапкері болып тағайындалуы мүмкін деген қауесетке пікір білдірді, деп хабарлайды Sports24.kz.
Бұған дейін БАҚ-та клуб басшылығы «Ливерпульдің» бұрынғы бапкерінің кандидатурасын қарастырып жатқаны туралы ақпарат тараған еді. Алайда Манн мұндай нұсқаның шындыққа жанасатынына күмән келтірді.
«Мен Арнені білемін — ол керемет бапкер, әлемдегі ең үздіктердің бірі. Бірақ Арне Слоттың «Ордабасыны» жаттықтыруға келмейтініне сенімді бола аласыздар. БАҚ мәліметінше, ол «Ливерпульде» жылына шамамен 15 миллион доллар тапқан. Егер клуб оның келуі үшін бүкіл жалақысын төлеуге әрі оны көндіруге дайын болмаса, бұл жай ғана мүмкін емес», — деді Манн.
Функционер сондай-ақ атақты шетелдік бапкерлердің кандидатурасын талқылағанда Қазақстан клубтарының қаржылық мүмкіндіктерін объективті бағалауға шақырды.
Еске салайық, «Ордабасы» 2026 жылғы маусымды тарихи жетістікпен аяқтап, клуб тарихында алғаш рет «алтын дубль» жасады. Шымкенттіктер Қазақстан чемпионы атанып, ел кубогын жеңіп алды.
Маусымның сәтті өткеніне қарамастан, клуб пен бас бапкер Андрей Мартин өзара келісім бойынша келісімшартты ұзартпау туралы шешім қабылдады. Молдова маманы команданы 2024 жылдың желтоқсанынан бері жаттықтырды.