Федерация Ясмина Токсанбаеваның аяқ киіміне байланысты наразылыққа қатысты пікір білдірді
Қазақстандық спортшы Ясмина Токсанбаева Жапонияда өтіп жатқан XX жазғы Азия ойындарында марафондық қашықтықтағы спорттық жүрістен алтын медаль жеңіп алды. Алайда жарыстан кейін спортшының нәтижесіне ол пайдаланған аяқ киімге байланысты наразылық білдірілді, деп хабарлайды Sports24.kz.
Токсанбаева 42,195 шақырымды 3 сағат 22 минут 20 секундта жүріп өтіп, мәреге бірінші болып жетті.
Жарыс аяқталғаннан кейін қазақстандық спортшы өнер көрсеткен аяқ киім үлгісіне байланысты наразылық білдірілді. Федерация Токсанбаеваның құқықтары мен мүдделерін қорғау жұмыстарын жалғастырып жатқанын мәлімдеді.
«World Athletics ұйымының рұқсат етілген аяқ киімдер тізімінде ASICS бренді көрсетілген. Алайда Ясмина жарыс кезінде киген аяқ киімнің нақты үлгісі бұл тізімде болмаған. Сонымен қатар жарыс басталар алдында спортшының аяқ киімі тексеріліп, оған жарысқа қатысуға рұқсат берілді», — делінген Федерация мәлімдемесінде.
Ұйым туындаған жағдайға байланысты спортшының мүддесін қорғау жұмыстарын жалғастыратынын атап өтті. Сонымен қатар Федерация техникалық талаптардың сақталуын бақылауды күшейту қажеттігін мойындады.
«Федерация жауапкершіліктен бас тартпайды. Спортшының сапалы дайындығы мен жарыстағы нәтижесінен бөлек, белгіленген регламенттер мен техникалық талаптардың сақталуы, сондай-ақ халықаралық спорт ұйымдарында спортшылардың мүддесін тиімді қорғау маңызды», — деп атап өтті ұйым.
Федерация Токсанбаеваның толыққанды жаттығу процесінен өтіп, медициналық-биологиялық сүйемелдеумен және жарысқа дайындалу үшін қажетті жағдайлармен қамтамасыз етілгенін атап өтті.
«Бұл жұмыстың нәтижесі қашықтықта көрінді: Ясмина мәреге бірінші болып жетіп, чемпиондық нәтиже көрсетті», — делінген мәлімдемеде.
Сондай-ақ Федерация халықаралық жарыстарда қазақстандық спортшылардың мүддесін қорғау үшін Қазақстан Ұлттық Олимпиадалық комитетімен өзара іс-қимылды күшейтуді жоспарлап отыр.
«Қазақстанның барлық спорт ұйымдарының ортақ міндеті — спортшы жарысқа шыққан кезде тек өзінің дайындығына ғана емес, сонымен қатар құқықтары мен мүдделерінің кәсіби түрде қорғалатынына да сенімді болуы үшін барлық қажетті шараларды қабылдау», — деп мәлімдеді Федерация.
Сонымен қатар наразылық пен шағым бойынша қорытынды шешім қандай болғанына қарамастан, Токсанбаева чемпионға тиесілі барлық сыйақыны алады.
«Біз үшін Ясмина — чемпион. Федерация оны қолдауды жалғастырады. Біз жолдаған наразылық пен шағымды қарау нәтижесіне қарамастан, чемпионға тиесілі барлық сыйақы Федерацияның өз қаражаты есебінен толық көлемде төленеді», — деп атап өтті ұйым.
