Қазақстандық маман Алмабаевтың RAF-дағы ойсырай жеңілуін түсіндірді
UFC-де өнер көрсететін қазақстандық файтер Асу Алмабаев күрес промоушені RAF (Real American Freestyle) турнирінде дебюттік жекпе-жегін өткізді, деп хабарлайды Sports24.kz.
Кливлендте (АҚШ) Алмабаев 34 жастағы америкалық балуан Джонни Диджилиуспен кездесті. Диджилиус мансабында студенттік күресте бақ сынап, 115-47 есебімен әсерлі рекордқа ие.
Қазақстандық спортшының дебюті сәтсіз өтті. Диджилиус бірінші раундта-ақ 10-0 есебімен жеңіске жетті.
Алмабаевтың жекпе-жегінен кейін Sports24.kz тілшісі балуан бапкері Дарыным Аманмен байланысып, RAF-дағы қазақстандықтың дебюті туралы пікірін білді.
Маманның айтуынша, басты айырмашылық — Алмабаев өзінің ММА-дағы негізгі қаруларын пайдалана алмаған ортада күресті.
«Мұнда түсіну керек, Асу ММА жекпе-жегіне емес, таза күреске шықты. Бұл — мүлдем басқа спорт түрі, мұнда октагонда онша әсер етпейтін ұсақ-түйек детальдар шешуші рөл атқарады. Диджилиус бүкіл мансабын студенттік күресте өткізген, осындай айқастарда мол тәжірибесі бар, сондықтан қай жерде, қашан тәуекелге бару керегін жақсы біледі».
Аманның айтуынша, ММА-да Алмабаев қарсыласымен жұмыс істеуге әлдеқайда көп құралға ие.
«Асу күресуге тырысты, бірақ жылдам-ақ, қарсы алдында осы спорт түрімен өмір бойы айналысқан адам тұрғанын сезінді. ММА-да Алмабаев соққылар, тордағы клинч, сабмишн қаупі секілді тәсілдерді қолдана алады, ал мұнда қолында тек күрес құралы ғана қалды. Бұл жерде Диджилиус айтарлықтай тәжірибелі болып шықты».
Сонымен қатар, бапкер RAF-да жеңіліс Алмабаевтың ММА-дағы күрес шеберлігіне баға беруге негіз болмауы керек деп есептейді.
«Мен бұл жеңілістен Асу-дің ММА-дағы күрес деңгейіне қатысты қорытынды шығармаймын. Бұл — пайдалы тәжірибе. Ол таза күрес пен аралас жекпе-жектегі күрестің қаншалықты өзгеше екенін сезінді».
Алмабаев үшін бұл RAF-дағы алғашқы өнер көрсетуі болды. Ал бір аптадан кейін, 30 тамызда, қазақстандық спортшы Стамбулда жеңіліп көрмеген тәжік файтері Халим Назрулоевпен (11-0) No-Gi Jiu-Jitsu ережесі бойынша тағы бір айқас өткізеді.
Бұған дейін Сиднейдегі 2000 жылғы Олимпиада ойындарының күміс жүлдегері, еркін күрестен қазақстандық балуан Ислам Байрамуков Асу Алмабаевтың Real American Freestyle лигасындағы дебюттік жекпе-жегіндегі негізгі қателіктерін атап өтті.
