«Астана» футболшыларға үш айлық жалақы қарызын төледі
Футболшыларға «Астана» клубының бұрын қалыптасқан жалақы қарызы бойынша төлемдер жасалды, деп хабарлайды Sports24.kz.
Қолда бар ақпаратқа сәйкес, бүгін, 11 қыркүйекте, клуб негізгі құрам футболшылары алдындағы жалақы қарызын жапты. Клуб футболшыларға үш айлық жалақы бойынша берешегін өтеді.
«Астананың» қаржылық мәселелері осы аптаның басында белгілі болды. 8 қыркүйекте елордалық команданың бірқатар футболшысы жалақы бойынша қарыз өтелгенге дейін матчтарға қатысудан бас тартуы мүмкін екені туралы ақпарат тарады. Жекелеген ойыншылардың кемінде үш ай бойы ақша алмағаны, ал қарыздың жалпы көлемі шамамен 700 млн теңге екені хабарланған болатын.
Сол күні «Астана» ресми мәлімдеме жасап, негізгі құрамдағы бірқатар футболшы алдындағы жекелеген келісімшарттық міндеттемелер бойынша қарыз бар екенін растады. Клуб команда басшылыққа ұжымдық үндеу жолдағанын атап өтті.
Сонымен қатар елордалық клуб футболшылар мен жаттықтырушылар штабы кәсіби міндеттерін орындауды жалғастырғанын, жаттығулар мен ресми матчтарға қатысқанын мәлімдеді.
Сол кезде «Астана» команда алдындағы келісімшарттық міндеттемелерді орындау үшін қажетті шараларды қабылдап жатқанын айтқан. Клуб басшылығы қарызды өтеу мәселесін құрылтайшымен бірлесіп шешіліп жатқан басым міндеттердің бірі деп атады.
Сондай-ақ клуб қаржылық мәселелер команданың Қазақстан чемпионатына қатысуына әсер етпейтініне сендірді.
«Астана» ел чемпионатындағы өнерін жалғастырып, маусымды соңына дейін жеткізеді», — делінген клуб мәлімдемесінде.
Осылайша, қазіргі уақытта футболшылар алдындағы қарыз өтелді, ал команда маусымның алдағы матчтарына дайындықты жалғастырып жатыр.
Қазақстан Премьер-лигасының 23 турында «Астана» турнирлік кестеде үшінші орында тұр. Елордалық клубтың еншісінде 45 ұпай бар. Жоғарыда «Ордабасы» (55) мен «Қайрат» (54) орналасқан.
