Жүсіповтің жеңісі мен Аққалықовтың даулы жеңілісі: Қазақстан үшін Әлем кубогының үшінші күні қалай өтті
Қазақстан құрамасы Қытайдың Гуйян қаласында өтіп жатқан World Boxing ұйымының Әлем кубогының екінші кезеңіндегі кезекті жарыс күнін өткізді, деп хабарлайды Sports24.kz.
Күннің ең тартысты жекпе-жектерінің бірі әлем чемпионатының күміс жүлдегері Сабыржан Аққалықовтың қатысуымен өтті. 80 келіге дейінгі салмақ дәрежесінің 1/8 финалында қазақстандық боксшы өзбекстандық Жавохир Умматалиевпен қолғап түйістірді. Үш раунд қорытындысы бойынша төрешілер жеңісті 3:2 есебімен қарсыласқа берді. Екінші раундта рефери Аққалықовқа нокдаун санады. Жекпе-жектен кейін қазақстандық спортшы төрешілер шешіміне көңілі толмағанын ишарамен көрсетті.
Бұл жарыс күні Серік Теміржанов үшін де сәтсіз аяқталды. 60 келіге дейінгі салмақтағы 1/8 финалдық кездесуде ол америкалық Салим Эллис-Бейге төрешілердің бірауызды шешімімен 0:5 есебімен жол берді.
Ал Қазақстан құрамасына жалғыз жеңісті Абылайхан Жүсіпов сыйлады. 70 келіге дейінгі салмақта өнер көрсететін боксшы 1/8 финалда бразилиялық Кайан Рейсті 4:1 есебімен жеңіп, турнирдің ширек финалына жолдама алды.
Осылайша, жарыс күнінің қорытындысы бойынша Қазақстан құрамасы екі боксшысынан айырылды. Дегенмен Абылайхан Жүсіповтің жеңісі командаға медаль үшін күресті жалғастыруға мүмкіндік беріп отыр.