Видео: Даулы шешім Аққалықовты өзбек боксшысын жеңу мүмкіндігінен айырды
Қытайдың Гуйян қаласында өтіп жатқан World Boxing ұйымының Әлем кубогының екінші кезеңінде қазақстандық боксшы Сабыржан Аққалықов жарысты аяқтады, деп хабарлайды Sports24.kz.
80 келіге дейінгі салмақ дәрежесіндегі 1/8 финалдық кездесуде әлем чемпионатының күміс жүлдегері Өзбекстан өкілі Жавохир Умматалиевпен қолғап түйістірді.
Үш раундқа созылған тартысты жекпе-жекте екінші раундта төреші Аққалықовқа нокдаун санады. Соған қарамастан қазақстандық боксшы кездесуді соңына дейін жалғастырып, қарсыласына лайықты қарсылық көрсетті.
Алайда төрешілердің шешімі бойынша жеңіс 3:2 есебімен Умматалиевке берілді. Осылайша өзбекстандық боксшы ширек финалға жолдама алса, Аққалықов турнирдегі өнерін аяқтады.
Еске салайық, Сабыржан Аққалықов жарысты 1/16 финалда Қытай боксшысы Хяобао Вангты 5:0 есебімен айқын жеңуден бастаған болатын. Қазақстандық спортшы сол кездесуде қарсыласына еш мүмкіндік бермей, келесі кезеңге сенімді түрде өткен еді.