WBO басшысы Әлімханұлының әлем чемпионы атағы үшін жекпе-жегін жариялады
Дүниежүзілік бокс ұйымы (WBO) екінші орта салмақтағы бос тұрған әлем чемпионы атағы үшін қазақстандық Жәнібек Әлімханұлы (17-0, 12 KO) мен жеңіліс көрмеген дат боксшысы Якоб Банк (20-0, 11 КО) арасындағы жекпе-жекті ресми түрде мақұлдады, деп хабарлайды Sports24.kz.
WBO президенті Густаво Оливьери әлеуметтік желідегі парақшасында Әлімханұлы мен Банктің командаларына жекпе-жекті өткізу жөнінде келісімге келу үшін 15 күн берілгенін хабарлады. Егер белгіленген мерзім ішінде келісім жасалмаса, ұйым промоутерлік сауда өткізеді.
Бұған дейін Әлімханұлы сол кезде WBO нұсқасы бойынша екінші орта салмақтағы чемпиондық белбеуге ие болған Хамза Ширазбен жекпе-жек өткізу жөнінде келіссөз жүргізуге тырысқан. Алайда тараптар ортақ мәмілеге келе алмады, содан кейін британдық боксшы чемпиондық белбеуден бас тартты.
Банк WBO рейтингінде үшінші орында тұр және бос тұрған титулға қолжетімді ең жоғары рейтингтегі үміткер саналады. Рейтингтің екінші сатысындағы Диего Пачеко қазіргі уақытта басқа қарсыласпен жекпе-жек өткізу жөнінде келіссөз жүргізіп жатыр.
