«Оның жеңілуі барлық өзбектің жеңілгенін білдірмейді»: Тоқтар өзбекстандық жанкүйерлерге үндеу жасады
28 тамызда Астанада IBA Nomad турнирі өтіп жатыр. Оның аясында қазақстандық актер әрі файтер Еркебұлан Тоқтар мен өзбекстандық Бобуржон «Испанчик» Исроилов арасында жекпе-жек өтті, деп хабарлайды Sports24.kz.
Жекпе-жек кәсіпқой бокс ережесі бойынша өтті. Кездесу Тоқтар үшін күтпеген жерден басталды – бірінші раундта-ақ қазақстандық файтер нокдаунға түсті.
Алайда екінші раундта Еркебұлан бастаманы толық өз қолына алды. Қазақстандық Исроиловты бірнеше рет нокдаунға түсірді, содан кейін рефери жекпе-жекті тоқтатып, Тоқтардың мерзімінен бұрын жеңгенін тіркеді.
«Төрт раунд бокс жасаймын деп ойладым»
Жекпе-жектен кейін Тоқтар бастапқыда кездесуді толық өткіземін деп жоспарлағанын айтты.
«Жоқ, төрт раунд бокс жасаймын деп ойладым, бірақ бір кезде ол соққылардан кейін құлап қалды. Негізі, ол өте мықты жігіт екен. Уайымдап кеттім, соққылардан кейін Тарасов өткен жолғыдай тұра алмай қалады ма деп ойладым. Бірақ жоқ, бұл жігіт мықты екен, орнынан тұрды. Жарайсың, жақсы жекпе-жек үшін рақмет».
Еркебұлан бірінші раундта өзі де ауыр соққы алғанын және содан кейін жекпе-жекке арналған бастапқы жоспарын өзгертуге тура келгенін атап өтті.
«Ол да жақсы, маған жақсы соққы жасады. Содан кейін жоспардан ауытқып, сәл-пәл колхозка қосуға тура келді».
«Оның жеңілуі барлық өзбектің жеңілгенін білдірмейді»
Жекпе-жектен кейін Тоқтар қазақстандық файтерге қарсылас таңдауды сынаған өзбекстандық жанкүйерлерге де үндеу жасады.
Еркебұлан Исроиловтың жеңілісін бүкіл өзбек боксының жеңілісі ретінде қабылдамауға шақырып, Өзбекстанға деген құрметін білдірді.
«Сондай-ақ өзбекстандық жанкүйерлерге бір нәрсе айтқым келеді. “Осындай қарсыласты жеңгеніне күлеміз” деп жазып жатыр екен. Бұл жігіт өте мықты, оның жеңілуі барлық өзбектің жеңілгенін білдірмейді. Мұнда Бобуржон мен Еркебұлан жұдырықтасып жатыр».
Сонымен қатар Тоқтар өзбекстандық жанкүйерлердің назарына іліккеніне қуанышты екенін мойындады.
«Мен Өзбекстанды қатты құрметтеймін, олар маған хайп сыйлайды. Сондай-ақ мені әрдайым қолдайтын Қазақстанға да рақмет айтқым келеді».
Қазақстандық файтер қарсыласының мінезін және ауыр соққылардан кейін де жекпе-жекті жалғастыра алғанын ерекше атап өтті.
«Менің қарсыласым “Испанчик” мықты. Соққылардан кейін қанша рет қайта тұрды? Төрт рет пе? Жарайсың!»
Сол кеште турнир аясында бокстан әлемнің екі дүркін чемпионы әрі 2020 жылғы Олимпиада ойындарының қола жүлдегері Сәкен Бибосынов та өнер көрсетті.
Қазақстандық боксшы рекорды 18-4-1 болатын тәжірибелі африкалық боксшы Иммануэль Йозефке қарсы сегіз раундтық жекпе-жек өткізді.
Бибосынов жеңіске жетіп, кәсіпқой мансабын жалғастырды. Бұл қазақстандық боксшының кәсіпқой бокстағы үшінші жекпе-жегі болды.
