Видео: US Open триумфынан кейін Елена Рыбакинаны Словакия Президенті сарайында қабылдады
Әлемнің бірінші ракеткасы Елена Рыбакина Словакиядағы Президент сарайында болды. Қазақстандық теннисшіні ел президенті Петер Пеллегрини қабылдап, US Open-2026 турниріндегі жеңісімен жеке құттықтады, деп хабарлайды Sports24.kz.
Нью-Йорктегі жарыста Рыбакина чемпиондық атаққа дейін жетіп, финалда Арина Соболенконы 6:4, 5:7, 6:2 есебімен жеңді. Осы нәтижеден кейін Қазақстан өкілі мансабында алғаш рет WTA рейтингінің көш басына көтерілді.
Президентпен кездесу Братиславада өтті. Пеллегрини Рыбакинаның Словакиямен ерекше байланысына назар аударды. Соңғы алты жылда теннисші маусымның белгілі бір бөлігін осы елде өткізіп, жаттығып, ірі турнирлерге дайындалып келеді.
«Әйелдер теннисіндегі әлемнің бірінші ракеткасы соңғы алты жылдан бері Словакияны өзінің екінші үйі санайтынын көпшілік біле бермейді. Елена халықаралық жарыстарда Қазақстан атынан өнер көрсеткенімен, жылдың едәуір бөлігін осында өткізіп, жаттығып, маңызды матчтар мен турнирлерге дайындалады. Сондықтан Словакия да оның спорттық жолының бір бөлігіне айналды. Еленаны Президент сарайында қабылдап, US Open-дегі жеңісімен жеке құттықтағаныма қуаныштымын», – деп жазды Пеллегрини әлеуметтік желідегі парақшасында.
2026 жыл Рыбакинаның мансабындағы ең табысты маусымдардың біріне айналды. Жыл басында ол Australian Open турнирінде топ жарса, қыркүйекте алғаш рет US Open чемпионы атанды.
Нью-Йорктегі жеңіс қазақстандық теннисшінің «Үлкен дулыға» турнирлеріндегі үшінші титулы болды. Рыбакина алғашқы ірі жүлдесін 2022 жылы Уимблдонда жеңіп алған. Кейін бұл жетістігін 2026 жылғы Australian Open және US Open турнирлеріндегі чемпиондықтарымен толықтырды.
US Open-нен кейін Елена WTA рейтингінде алғаш рет бірінші орынға көтерілді. Осылайша ол әлемдік жекелей рейтингтің көшін бастаған Қазақстанның алғашқы өкілі атанды.
Рыбакина халықаралық жарыстарда Қазақстан атынан 2018 жылдан бері өнер көрсетіп келеді.
