«Басқа ғалам секілді»: «Лада» бапкері «Барыстан» ойсырай жеңілгеннен кейін мәлімдеме жасады
Алты шайба жіберіп, қарсылас қақпасына бірде-бір гол соға алмады. «Барысқа» қарсы өз алаңындағы кездесу «Лада» үшін сәтсіз аяқталды. Финалдық сиренадан кейін тольяттиліктердің бас бапкері Павел Зубов ақталуға тырыспай, командасының ойынын қатаң сынға алды, деп хабарлайды Sports24.kz.
Маман кездесуден тек бір оң тұсты атап өтті. Оның айтуынша, «Лада» ойыншылары сан аздығында жақсы әрекет етіп, соңына дейін күрескен. Ал команданың қалған ойыны бапкерлер штабы күткен деңгейден алыс болды.
«0:6 есебімен жеңілдік. Оң тұс ретінде сан аздығындағы ойынымызды ғана айта аламын. Жігіттер сол сәттерде барын салып, күресуге тырысты. Ал қалғанының бәрі басқа ғаламда өтіп жатқандай әсер қалдырды. Мұндай жағдай қалыпты емес. Оның себептері бар, әрине, бірақ қазір оған тереңірек тоқталмаймын», - деді Зубов.
Бапкердің мұндай бағасы да бекер емес. «Лада» 60 минут ішінде «Барыс» қақпасына небәрі жеті дәл соққы жасады. Бұл көрсеткіш ҚХЛ тарихындағы антирекордқа айналды.
Ал астаналықтар керісінше, ойын өрбіген сайын басымдығын арттыра түсті. Бірінші кезеңде Джейк Масси есеп ашса, екінші жиырма минуттықта Джастин Бэйли мен Семен Симонов мергендік танытты. Соңғы кезеңде Иэн Маккошен, Бэйли және Тайс Томпсон тағы үш шайба соқты. Қорытынды есеп - 6:0.
Тольяттидегі кездесу Михаил Кравец командасы үшін 2026/27 маусымындағы алғашқы сырт алаңдағы матч болды. Бұл жеңіс «Барысқа» «Амурдан» өз алаңында 1:3 есебімен ұтылғаннан кейін қайта жеңісті жолға түсуге мүмкіндік берді.
Астаналық клуб төрт кездесудің үшеуінде жеңіске жетті. Бұған дейін «Барыс» «Сібірді» 7:1 есебімен ойсырата жеңіп, «Салават Юлаевтан» 8:6 есебімен басым түскен еді.
Келесі ойынын «Барыс» 18 қыркүйекте сырт алаңда Магнитогорскінің «Металлургіне» қарсы өткізеді.
