Скатов Марожанмен ойнайды: Almaty Open турнирінің екінші ойын күніндегі басты матчтар
20 қазанда Almaty Arena корттарында ATP 250 санатындағы халықаралық Almaty Open турнирінің негізгі сеткасы бірінші кезеңіндегі матчтар жалғасады, деп хабарлайды Sports24.kz.
Назар қазақстандық теннисші Тимофей Скатовтың өнеріне, сондай-ақ әлемдік турдың танымал ойыншылары — Стефанос Циципас пен Карен Хачановтың қатысуымен өтетін кездесулерге аударылады.
Ұйымдастырушылардан арнайы шақырту (wild card) алған 25 жастағы Тимофей Скатов Венгрия өкілі Фабиан Марожанмен кездеседі. Қазақстандық ATP әлемдік рейтингінде 201-орында, ал оның қарсыласы 64-сатыда тұр.
Бұған дейін теннисшілер ATP турнирлерінің іріктеу кезеңінде — 2023 жылы Рим мен Венада — екі рет кездескен. Екі қарсыластықта да Марожан жеңіске жетті. Алайда ATP Tour негізгі сеткасындағы алдағы матч олар үшін алғашқы кездесу болмақ.
Бұрын жасөспірімдер арасындағы әлемнің бірінші ракеткасы болған Скатов ATP Tour-дағы дебютін 2020 жылы Астанада өткен үй турнирінде жасады. Бір жылдан кейін ол италиялық Андреас Сеппиді жеңіп, осы деңгейдегі алғашқы жеңісіне қол жеткізді. Қазақстандықтың еншісінде ATP Challenger сериясындағы үш титул және Дэвис кубогы аясында әлемдік рейтингтің топ-30 өкілдерін жеңген матчтар бар.
Оның қарсыласы Фабиан Марожан 2023 жылы Римде өткен Masters 1000 турнирінде әлемнің екінші ракеткасы Карлос Алькарасоны жеңуімен танымал. Биылғы маусымда венгриялық теннисші ATP турнирлерінің жартылай финалына үш рет — Оклендте, Бухаресте және Мальоркада — жетті. Былтырғы Almaty Open турнирінде ол ширек финалға дейін барды.
Күннің тағы бір қызықты қарсыласуы жетінші нөмірлі Стефанос Циципастың америкалық Александр Ковачевичпен кездесуі болады. Әлемнің бұрынғы үшінші ракеткасы, ATP-дің 13 титулының иегері саналатын грек теннисшісі 2022 жылы жарыс Астанада өткен кезде финалға жеткен турнирге қайта оралады.
Циципас пен Ковачевич бұған дейін екі рет кездесіп, өзара бір-бір жеңістен бөліскен. Соңғы матч 2026 жылы Уинстон-Сейлемде өтіп, америкалықтың пайдасына аяқталды. Алдағы қарсыласудың жеңімпазы екінші айналымда бұған дейін грек Стефанос Сакелларидисті жеңген Қазақстан өкілі Михаил Кукушкинмен ойнайды.
Орталық кортта 2024 жылғы турнир чемпионы Карен Хачанов та өнер көрсетеді. Бесінші нөмірлі теннисші іріктеу кезеңінен сүрінбей өткен 20 жастағы жапониялық Рэй Сакамотомен кездеседі. Жас теннисші бұған дейін әлемдік жасөспірімдер рейтингін басқарған, ал биыл қазанда Шанхайда өткен Masters 1000 турнирінде Андрей Рублевті жеңді.
Тағы бір матчта француз Теренс Атман жұптық разрядта 2023 жылғы Australian Open чемпионы австралиялық Ринки Хидзикатамен ойнайды. Қарсыластар бұған дейін бір-бірімен кездеспеген.
Сонымен қатар бірінші кортта негізгі сеткаға іріктеу арқылы жолдама алған жапониялық Сё Симабукуро мен Ресей өкілі Роман Сафиуллин арасындағы матч жоспарланған.
ATP 250 санатындағы Almaty Open турнирі Almaty Arena корттарында өтіп, Қазақстанның және шетелдің жетекші теннисшілерін бір алаңға жинайды.
Қазақстан бойынша спутниктік Starlink желісіне қосылған Direct to Mobile технологиясының арқасында алғашқы ғарыштық мобильді байланыс тек Beeline клиенттерінде.
